Nýr Kani á leið til Ármanns: „Getur vonandi leyst ýmsa hluti fyrir okkur“

Ármann tapaði með 24 stigum fyrir Njarðvík, 99-75, og bíður enn eftir sínum fyrsta sigri í Bónus deildinni. Ármenningar byrjuðu seinni hálfleikinn af krafti og minnkuðu muninn í þrjú stig en nær komust þeir ekki.

„Við erum inni í leiknum fram í miðjan 3. leikhluta en þá náðu þeir góðu áhlaupi á okkur og forystu fyrir 4. leikhluta og það dró vindinn úr okkur,“ sagði Steinar í leikslok. 

„Við erum þunnskipaðir og menn verða þreyttir. Við vorum komnir í villuvandræði, þurftum að dreifa álaginu og þeir keyrðu á okkur og voru betri í seinni hálfleik.“

Ármenningar voru án bandarísks leikmanns í kvöld en Steinar segir að nýr Kani sé væntanlegur til liðsins.

„Við eigum von á leikmanni vonandi sem allra fyrst. Það er stutt í það,“ sagði þjálfarinn.

En hvers konar leikmaður er nýi Kaninn?

„Þetta er svona „combo“ bakvörður sem getur vonandi leyst ýmsa hluti fyrir okkur. Hann getur vonandi tekið að sér leikstjórnandahlutverk í bland við hina sem eru að spila það og frákastað. Okkur vantar menn í fráköst og styrk gegn þessum liðum. Við erum að vonast til að hann komi með það fyrir okkur,“ svaraði Steinar.

Þrátt fyrir að Ármann hafi tapað öllum átta leikjum sínum í Bónus deildinni segir Steinar að andinn í hópi nýliðanna sé góður.

„Mórallinn á æfingum er góður. Það eru allir meðvitaðir, og voru það frá byrjun, hvað við vorum að koma inn í þessa deild. Við erum með yngsta og óreyndasta lið deildarinnar. Umgjörðin hjá okkur er lítil þótt það séu stórkostlegir sjálfboðaliðar í kringum Ármann,“ sagði Steinar.

„Það var meðvitund um að þetta yrði erfitt. Auðvitað er hundleiðinlegt að tapa leik eftir leik en við erum bara brattir að vinna inni í þeim ramma sem við erum með. Við ætlum að halda áfram að gera það og við reynum að byggja á atriðum sem ganga vel, setja okkur markmið leik fyrir leik og ætlum að halda því áfram,“ bætti Steinar við að endingu.