Engar upp­sagnir í far­vatninu

Frá þessu greinir Morgunblaðið og hefur eftir Haraldi Benediktssyni, bæjarstjóra Akraneskaupstaðar. Haraldur var meðal sveitarstjórnar- og þingmanna sem sátu fund með Gunnari Gunnlaugssyni, forstjóra Norðuráls, á þriðjudag. 

Rætt var um bilunina á fundinum, aðdraganda hennar og mögulegar úrlausnir. Unnið er að pöntun á hlutum sem vantar til viðgerðar. Það myndi skýrast á næstu tveimur vikum hversu lengi framleiðsla myndi liggja niðri og hvaða áhrif bilunin myndi hafa á önnur verkefni.

„Þeir sögðust þurfa á starfsmönnunum að halda; heilmikið væri af verkefnum sem biðu, þar á meðal standsetning verksmiðjunnar á nýjan leik. Mikilvægt væri að halda í vant og þjálfað starfsfólk; það væri grundvöllurinn að farsælli gangsetningu verksmiðjunnar,“ hefur Morgunblaðið eftir Haraldi.

Haraldur segir fundarmenn hafa verið ánægða með svörin sem þeir fengu og að þeir hefðu góða tilfinningu gagnvart framhaldinu.