Slapp með skrekkinn við mynda­töku í Reynisfjöru

Slóvakískir aðilar sem skipuleggja ferðir til Íslands vöktu athygli á atvikinu á samfélagsmiðlum sínum í síðustu viku. Myndskeiðið var sett inn þann 7. október og segja stjórnendur síðunnar að atvikið sé nýlegt.

Þar má sjá ferðamann í appelsínugulum regnjakka tylla sér við stuðlabergið í flæðamálinu í Reynisfjöru og stilla sér upp fyrir myndatöku. Á augabragði skellur alda á manninum og nærstöddu fólki með miklum tilþrifum.

Myndskeiðið má sjá að neðan og er enn ein áminningin um hættuna í Reynisfjöru. Í athugasemdum segja stjórnendur síðunnar að manninum hafi ekki orðið meint af.