Eignaumsjón kaupir Rekstrarumsjón

Í fréttatilkynningu þess efnis er haft eftir Helgu Soffíu Guðjónsdóttur og Hrafnhildi Guðjónsdóttur, framkvæmdastjórum Rekstrarumsjónar, að miklar breytingar hafi orðið á þjónustu við hús- og rekstrarfélög frá því að Rekstrarumsjón tók til starfa fyrir átta árum.

„Reksturinn er orðinn flóknari og umfangsmeiri en í upphafi og við stóðum frammi fyrir því að tæknivæða og sérhæfa reksturinn enn frekar með verulegum tilkostnaði til að geta sinnt viðskiptavinum okkar. Það er góð lausn að okkar mati að sameinast Eignaumsjón, sem er öflugur aðili á þessu sviði og tryggja þannig að áfram verði vel hugsað um okkar viðskiptavini og þeirra hagsmuni.“

Þá er haft eftir Daníel Árnasyni, framkvæmdastjóra Eignaumsjónar, að starfsmenn félagsins hlakki til að fá nýja slíka til liðs við fyrirtækið og að þeir hlakki til að takast á við áskorunina sem felst í sameiningu félaganna.

„Eignaumsjón hefur verið leiðandi í þjónustu við húsfélög og rekstrarfélög fjöleignarhúsa í 25 ár. Við ætlum að halda áfram að þróa þá þjónustu til að mæta enn betur sívaxandi þörfum eigenda fasteigna með skilvirkum tæknilausnum og öruggri og ábyrgri þjónustu.“

Loks segir að starfsemi Rekstrarumsjónar flytjist formlega til Eignaumsjónar 1. nóvember 2025. Starfsfólk Rekstrarumsjónar komi þá til starfa á skrifstofu Eignaumsjónar, sem tryggi að viðskiptavinir Rekstrarumsjónar njóti eftir sem áður þjónustu starfsfólks sem þekki vel til þeirra mála og í samræmi við gildandi þjónustusamninga.