Strava stefnir Garmin

Strava hefur framleitt hugbúnað um árabil sem flestir kannast við í samnefndu smáforriti fyrir snjallsíma sem gerir íþróttamönnum kleyft að skrásetja æfingar sínar. Garmin er svo eitt af þekktustu nöfnunum í framleiðslu á líkamsræktargræjum líkt og hlaupaúr. Í umfjöllun Verge kemur fram að málshöfðunin hafi verið lögð fram í héraðsdómi í Colorado þann 30. september og halda forsvarsmenn Strava því fram að kollegar sínir hjá Garmin hafi brotið samning milli fyrirtækjanna.

Garmin hafi brotið á einkaleyfum Strava á svokallaðri „segments“ tækni, það er leiðarkafla þar sem íþróttafólk getur borið saman árangurstíma, auk hitakorts sem sýni vinsæl svæði fyrir hreyfingu. Strava krefst varanlegs lögbanns til að koma í veg fyrir að Garmin selji eða bjóði upp á vörur sem innihalda þessa eiginleika.

Fyrirtækið segir að fjárhagslegar bætur einur og sér séu ófullnægjandi. Brotin segja Strava menn að nái til Garmin Connect smáforritsins og meirihluta tækja frá Garmin, þar á meðal Edge-hjólatölva og Forerunner, Fenix og Epix hlaupaúra.

Strava sótti um einkaleyfi fyrir „segments“ árið 2011 og fékk leyfið 2015. Garmin ýtti úr vör smáforriti sínu árið 2014 sem innihélt sambærilega tækni. Fyrirtækin skrifuðu svo árið 2015 undir víðtækan samstarfssamning sem færði tækni Strava inn í græjur Garmin.

Hafa átt í áralöngu samstarfi

Þess er getið í umfjöllun The Verge að málshöfðunin komi á óvart sökum víðtæks samstarfs fyrirtækjanna í fortíðinni. Þess hafi verið getið í skýrslum Strava að Forerunner hlaupaúr Garmin hafi verið eitt það vinsælasta hjá notendum Strava. Forsvarsmenn Strava segja hinsvegar að forsvarsmenn Garmin hafi nýtt sér samstarfið á óheiðarlegan hátt.

„Garmin fékk takmarkað leyfi frá Strava til þess að innleiða Strava Segments í tækin sín. Þeir nýttu sér þennan aðgang hinsvegar til þess að rannsaka þessa eiginleika vandlega, afrita þá nákvæmlega og gefa þá síðan út sem Garmin-eiginleika. Fyrir vikið hefur Strava höfðað mál gegn Garmin til að vernda einkaleyfisvarðar uppfinningar sínar,“ hefur miðillinn eftir Brian Bell talsmanni Strava.

„Garmin hafnaði ítrekuðum tilraunum Strava til að leysa úr broti Garmin með óformlegum hætti og neyddi þannig Strava til að taka afstöðu í málinu og höfða mál. Við ætlum ekki að grípa til neinna aðgerða sem myndu trufla möguleika Garmin-notenda á að samstilla gögn sín við Strava og vonum að Garmin meti sameiginlega notendur okkar á sama hátt.“