Boeing sagt byrjað að þróa arf­taka 737 max-þotunnar

Blaðið tók fram að þróun flugvélarinnar væri á frumstigi. Engu að síður væri þetta stefnubreyting þar sem ætlunin væri að þróa nýja flugvél frá grunni en ekki að endurbæta eldri tegund.

Wall Street Journal sagði forstjóra Boeing, Kelly Ortberg, hafa fundað með hreyflaframleiðandanum Rolls Royce í Bretlandi í febrúar um smíði nýrra hreyfla fyrir flugvélina. Boeing hefur hins vegar sagt fréttina villandi án þess þó að útskýra á hvern hátt. Þá hefur Rolls Royce neitað að tjá sig um málið.

Boeing segist í yfirlýsingu einbeita sér að endurreisnaráætlun fyrirtækisins, þar á meðal að framleiða fyrirliggjandi pantanir á nærri sex þúsund flugvélum, sem og að fá vottun fyrir nýju gerðirnar 737 max-7, 737 max-10 og 777-9.

„Á sama tíma, eins og við höfum gert áratugum saman, metum við markaðinn, þróum lykiltækni og bætum fjárhagslega afkomu okkar, til að vera viðbúin þegar rétti tíminn kemur að halda áfram með nýja vöru,“ segir Boeing.

Ráðamenn Icelandair völdu maxinn árið 2012, sem rifja má upp hér:

Sérfræðingar flugfréttamiðla, sem fjallað hafa um málið, segja að það kunni að virka öfugsnúið að byrja að þróa nýjan arftaka á sama tíma og 737 max-þotur séu uppseldar til ársins 2031 og framundan sé að koma nýju max-7 og max-10 gerðunum í notkun hjá flugfélögum.

737 byggi hins vegar á gamalli hönnun og smíði hennar hafi hafist árið 1965. Vart verði gengið lengra í uppfærslu hennar. Þróun nýrrar flugvélar ásamt flugprófunum taki langan tíma og því sé ekki seinna vænna að byrja. Ný farþegaflugvél yrði vart komin í notkun flugfélaga fyrr en árið 2035.

Icelandair fékk fyrsta maxinn í byrjun mars 2018, sem sagt var frá hér:

Jafnframt hafa greinendur vakið athygli á því að Boeing virðist ekki ætla að halda áfram með þróun lítillar breiðþotu í flokki meðalstórra farþegaflugvéla, sem kölluð var Boeing 797, og var ætlað að koma í stað 757 og 767-vélanna. Þess í stað virðist Boeing ætla að smíða mjóþotu, flugvél sem skákað geti nýjustu gerðum Airbus A321, sem slegið hafa í gegn meðal flugrekenda.

Icelandair er í hópi flugfélaga sem áður voru tryggir Boeing-kaupendur en völdu í staðinn Airbus A321, einfaldlega vegna þess að Boeing hefur ekki haft neinn sambærilegan valkost að bjóða, sem geti komið í staðinn fyrir Boeing 757.

Þetta var útskýrt í Flugþjóðinni á Stöð 2 fyrr á árinu um Boeing 757-þotuna:

Einnig var fjallað um val Icelandair á Airbus í þætti um Airbus-þoturnar: