Ueno snýr aftur og Haraldur fram­kvæmda­stjóri

Haraldur, sem oftast er kallaður Halli, hefur látið mikið að sér kveða í íslensku samfélagi og atvinnulífi á undanförnum árum, meðal annars með verkefninu Römpum upp Ísland, auk þess sem hann hefur reynt fyrir sér í tónlist og kvikmyndaleik og stofnað veitingahús svo fátt eitt sé nefnt.

Byrjaði í heimahúsi í Reykjavík en óx hratt

„Þetta kemur mér sjálfum nokkuð á óvart. Þetta var ekki planið hjá mér. Ég byrjaði með Ueno í íbúðinni minni í Reykjavík á Íslandi árið 2014. Sjö árum síðar seldi ég það til Twitter fyrir mikinn pening. En það voru ekki peningarnir. Það er kannski erfitt að trúa því en það var ekki ástæðan. Viðskiptin gengu vel, mig vantaði ekki pening. Ég þurfti nýja áskorun,“ skrifar Haraldur meðal annars í færslunni sem er rituð á ensku.

Ueno hafi haldið áfram að vaxa á þessum sjö árum, orðið að mörgum skrifstofum með yfir hundrað starfsmenn. Fyrirtækið hafi unnið með stórum vörumerkjum á heimsvísu í mörgum spennandi verkefnum, en Haraldi hafi fundist eitthvað vanta.

Hann hafi lengi fylgst með utan frá, unnið með fyrirtækjum að því að skapa eitthvað sem þau hafi síðan tekið við og haldið áfram að hlúa að og leyfa því að vaxa. Hann hafi langað að vera partur af slíku, að vera innan stórs fyrirtækis og sjá hlutina vaxa og dafna innan frá og fylgja verkefnum eftir.

Sjá einnig: Stóð við sitt og hefur greitt um hálfan milljarð í skatta

„Ég vildi áskorun og sú stærsta sem ég gat fundið var Twitter. Að hjálpa fólki að mynda betri tengsl, finna þeim samfélag, og tengjast á heiðarlegri hátt. En það fór ekki eins og ég hafði búist við. Eftir á að hyggja er það ekki það sem skiptir mestu máli. Við unnum stórkostlega vinnu og lærðum meira en mig hafði órað fyrir,“ skrifar Haraldur.

Það hafi verið lærdómsríkt ferðalag í gegnum viðskiptalegar, og persónulegar, hæðir og lægðir. Hann hafi öðlast frelsi til að gera aðra og nýja hluti, rampaði meðal annars upp Ísland og fleiri staði um heiminn, opnaði veitinga- og kvikmyndahús, banka, upptökuver og samfélagsvettvang fyrir skapandi fólk. Hlaðvarp, plötuútgáfa og leikur í kvikmyndum var annað sem hann tókst á við að prófa.

„Ég gerði allt sem mig hafði alltaf langað til að gera. Og það var frábært. En eftir fjögur ár í burtu frá Ueno hélt það áfram að pota í mig. Þessi litli kláði. Tilfinningin sem ég fæ þegar einhver kemur með eitthvað sem er bara hugmynd og vill aðstoð við að sjá hana verða að veruleika,“ segir ennfremur í færslu Haraldar.

Sú tilfinning minni á töfra og hennar hafi hann saknað. Þess vegna sé Ueno snúið aftur.

Færslu Haraldar má sjá í heild sinni hér að neðan.