„Þegar maður klæðist þessari treyju er maður stór“

Eftir fjóra jafna leiki steinlá Ísland fyrir Frakklandi í dag, 114-74. Franska liðið byrjaði leikinn af miklum krafti og gaf því íslenska engin grið.

„Þetta var kannski viðbúið. Eftir þétt og langt mót kom það bersýnilega í ljós hvort liðið er með meiri breidd og búið að dreifa álaginu aðeins betur. Þeir klikkuðu ekki á skoti strax í 1. leikhluta og þá er rosalega erfitt fyrir okkur að ætla að koma til baka og gera eitthvað,“ sagði Martin í samtali við Val Pál Eiríksson eftir leikinn gegn Frakklandi. 

„Við höfum lagt allt í þetta verkefni og það er ekki hægt að biðja um meira. Frakkarnir eru enn of stórir fyrir okkur en erum byrjaðir að nálgast þessar þjóðir,“ bætti Martin.

Nýbyrjuð að skrifa söguna okkar á þessu stigi

Hann segir að tilfinningarnar eftir mótið séu blendnar.

„Það er rosa erfitt að standa hérna og ætla að greina þetta. Það var margt mjög gott og margt sem hefði getað farið betur eins og þetta er alltaf á þessum mótum. Eina sem maður getur sagt er að við lögðum okkur 150 prósent fram og við gáfum okkur alla í verkefnið. Mér fannst undirbúningurinn var frábær og þjálfarateymið leggja þetta frábærlega upp,“ sagði Martin.

„Við erum ennþá nýbyrjuð að skrifa okkar körfuboltasögu á þessu stigi en ég held að fólk sjái það bersýnilega að með frammistöðu liðsins á þessu móti, miðað við EM 2015 og 2017, að við erum komnir til að vera. Við erum með það gott lið að við getum staðið í öllum. Ég trúi því að ef við hefðum mætt Frökkunum í fyrsta leik hefði þetta verið öðruvísi. Þá hefðum við kannski haft meiri orku og lappirnar ferskari. En það er margt gott sem við getum tekið með út úr þessu móti og margt sem er svekkjandi eftir á.“

Ekkert skemmtilegra en að vera með þessum hóp

Eftir erfiða byrjun á mótinu spilaði Martin vel í síðustu tveimur leikjunum og var stigahæstur í þeim báðum.

„Það var gott að geta sýnt fólki að ég er hér ennþá,“ sagði Martin sem nýtur þess til hins ítrasta að spila fyrir íslenska landsliðið.

„Þetta var tilfinningarússíbani. Við renndum kannski blint í sjóinn. Það er enginn okkar með reynslu í að leiða landslið á stórmóti og við erum ekki vanir að spila svona marga leiki á skömmum tíma með landsliðinu. Tilfinningin er bara stolt. Þegar maður klæðist þessari treyju er maður stór. Það er ekkert skemmtilegra en að vera með þessum hóp og þessum gaurum. Það er alltaf gaman. Ég hef verið með þetta að atvinnu í rúman áratug og þetta er ekki alltaf gaman en það er erfitt að lýsa þessu og þú skilur ekki þessa tilfinningu nema vera partur af þessu. Ég trúi því að Ísland sé komið til að vera. Við erum orðnir góðir í körfubolta og nú þurfum við að halda rétt á spilunum, gefa í, halda áfram að bæta okkur og setja metnað á þá staði sem þurfa að vera í lagi. Þá er framtíðin björt.

Martin langar á fleiri stórmót með íslenska liðinu.

„Það eru bara tvö ár í HM og verður EM 2029. Auðvitað verða einhverjar breytingar og menn eru ekkert að yngjast en ég á fullt eftir. Þrjátíu ára er ekkert í þessum körfubolta lengur,“ sagði Martin að lokum.

Viðtalið við Martin má sjá í spilaranum hér fyrir ofan.