Tölurnar á bak við hundrað lands­leiki Ægis

Ægir átti fínan leik alveg eins og í leik 99. Hann var með 9 stig og 5 stoðsendingar í leiknum em Ægir hitti úr fjórum af fimm skotum sínum. Hann var samanlagt með sextán stig og tíu stoðsendingar í landsleikjum 99 og 100.

Hér fyrir neðan má sjá nokkra athyglisverða tölfræðipunkta um landsliðsferil Ægis til þessa. 

Ægir og landsleikirnir hundrað

5108 - Ægir lék sinn fyrsta landsleik á móti Kína og úti í Kína 9. september 2011. Hann skoraði fjögur stig í fjórtán stiga tapi. Síðan eru liðnir 5108 dagar eða þrettán ár, ellefu mánuðir og 25 dagar.

470 - Ægir hefur alls skorað 470 stig í landsleikjunum hundrað eða 4,7 stig að meðaltali í leik. Hann er samanlagt með 47 þriggja stiga körfur.

83 - Leikir fyrir Craig Pedersen en hann spilaði þrettán fyrir Peter Öqvist og fjóra fyrir Pétur Má Sigurðsson.

70 - Ægir hefur spilað flesta landsleiki með Elvari Má Friðrikssyni en þeir hafa nú spilað sjötíu landsleiki saman. Hann hefur spilað 64 landsleiki með Tryggva Snæ Hlinasyni og 63 landsleiki með Martin Hermannssyni.

60 - Ægir hefur spilað flesta landsleiki sína í treyju númer þrjú eða sextíu af þeim. Hann hefur spilað tuttugu landsleiki í treyju númer þrettán, ellefu landsleiki í treyju númer 20, átta landsleiki í treyju númer tíu og einn landsleik í treyju númer tólf.

35 - Ægir hefur verið verið í byrjunarliðinu í tveimur síðustu leikjum Íslands á EM sem þýðir að hann hefur byrjað alls 35 landsleiki á ferlinum. Ægir var fyrst í byrjunarliðinu á móti Slóvakíu í ágúst 2012.

34% - Ægir hefur verið í sigurliði í 34 af leikjunum 100 sem gerir 34 prósent sigurhlutfall.

32 - Ægir hefur verið fyrirliði landsliðsins í 32 leikjum en hann var fyrst fyrirliði landsliðsins í leik á móti Eistlandi í júlí 2021. Hann hefur síðan verið fyrirliði í öllum landsleiikjum sínum frá því í nóvember 2021.

29 - Aðeins 29 af þesssum hundrað landsleikjum hafa verið vináttulandleikir og hefur Ægir því spilað 71 keppnisleik fyrir íslenska landsliðið.

27 - Ægir hefur mest skorað 27 stig í einum leik en það var á móti San Marínó á Smáþjóðaleikunum í Lúxemborg í maí 2013. Ægir hitti úr 6 af 9 þriggja stiga skotum sínum í leiknum.

21 - Ægir hefur spilað flesta landsleiki í einu húsi í Laugardalshöllinni eða alls 21 leik. 

15. - Ægir er sá fimmtándi sem nær því að spila hundrað landsleiki fyrir Íslands. Næstur á undan honum var Jón Arnór Stefánsson í febrúar 2019.

14 - Þetta er fjórtánda landsliðsár Ægis, það hann hefur spilað landsleik á fjórtán árum. Hans fyrsta ár var 2011 og Ægir hefur spilað landsleik á öllum árum síðan þá nema árið 2014.

13 - Ægir hefur skorað tíu stiga eða meira í þrettán leikjum og alls sjö sinnum fimmtán stig eða meira. Hann hefur skorað fimm stig eða meira í fjörutíu landsleikjum.

9 - Ægir hefur spilað landsleiki sem leikmaður níu félaga en flesta þeirra sem leikmaður Stjörnunnar eða 32. Hann hefur einnig spilað landsleiki sem leikmaður Sundsvall (15), Fjölnis (13), Burgos (13), Penas Huesca (8), CB Lucentum Alicante 8), Gipuzkoa Basket (5), Newberry (4) og Tau Castelló (2).

8 - Ægir hefur mest gefið átta stoðsendingar í einum leik en því náði hann tvisvar. Fyrst á móti Andorrra 2015 og svo á móti Slóveníu 2020. Hann hefur einnig mest náð átta fráköstum í einum landsleik en það var á móti Kósovó 2020.

7 - Ægir hefur spilað flest landsleiki gegn Belgum eða sjö. Hann hefur spilað sex sinum við ítala og Ungverja og fimm sinnum á móti bæði Svartfjallalandi og Póllandi. Ægir hefur alls mætt 35 þjóðum sem leikmaður Íslands.