Ein­kunnir á móti Pól­landi: Tryggvi í tröllaham og nóg af töffurum í liðinu

Íslenska liðið kastaði frá sér sigrinum i leik tvö en í kvöld voru strákarnir allan tímann að elta sterkt pólskt lið sem nýtti sér vel að spila fyrir framan troðfulla höll. Annað naumt tap en andinn var allt öðruvísi í kringum þetta tap.

Að þessu sinni gerðu strákarnir frábærlega í að vinna sig inn í leikinn með trú, baráttu og nóg af íslensku geðveikinni. Aftur munaði litlu en þetta var allt annars konar svekkelsi. Það vantaði töffaraskap í gær en að þessu sinni var nóg af töffurum í liðinu.

Nú var liðið komið inn i leikinn þegar dómarar leiksins ákváðu að taka yfir leikinn og öll von fór út um verður og vind.

Skotin hafa ekki verið að ganga á þessu móti og að var sérstaklega áberandi í kvöld þegar Pólverjar voru tilbúnir að fórna opnum langskotum fyrir það að þétta teiginn. Því miður tókst strákunum ekki á nýta sér það og 24 prósent þriggja stiga nýting er ekki nógu gott.

Liðið var lengstum að spila vel varnarlega og þar skipti miklu máli að Ægir Þór Steinarsson var með frá fyrstu sekúndu og fékk tækifæri til að gefa tóninn.

Eftir fínan fyrri hálfleik voru lokasekúndurnar aftur á móti hræðilegar og því munaði níu stigum á liðunum í hálfleik.

Slæm byrjun á seinni hálfleik var annar skellur og leikurinn var farinn frá liðinu. Liðið gafst þó ekki upp og hékk í pólska liðinu. Frábær fjórði leikhluti kom liðinu aftur inn í leikinn þegar fáránleg dómgæsla kláraði leikinn.

Sóknartvíeykið Martin Hermannsson og Elvar Már Friðriksson voru slakir framan af og það er ekki hægt að ætlast til að íslenska liðið fái mikið úr leik þar sem þessir tveir eru samanlagt 3 af 14 í skotum og með átta tapaða bolta að auki. Þannig var staðan eftir þrjá fyrstu leikhlutana.

Andlegi styrkur þeirra beggja að gefast ekki upp þótt á móti blæs var til mikillar fyrirmyndar og þeir enduðu báðir leikir mjög sterkt. Sannir stríðsmenn sem spila með hjartanu þótti hlutirnir séu ekki að ganga upp.

Tryggvi Snær átti auðvitað frábæra spretti í þessum leik eins og hinum tveimur. Þvílíkar tröllaframmistöður leik eftir leik. Hann er í sérflokki í íslenska liðinu og er í hópi bestu leikmanna mótsins.

Hér fyrir neðan má sjá hvernig íslensku strákarnir stóðu sig í kvöld.

Byrjunarliðið:

Ægir Þór Steinarsson, bakvörður 5

7 stig og 5 stoðsendingar á 28:24 mínútum (PlúsMínus: -10 Framlag: 12)

Kom inn í byrjunarliðið í fyrsta sinn í mótinu og fékk það verkefni að djöflast í Bandaríkjamanninum í liði Pólverja, Jordan Loyd, sem hann gerði svo sannarlega. Í sókninni gerði hann mjög vel í að finna Tryggva og hjálpa stóra manninum inn í leikinn. Ægir tók við meiri ábyrgð fagnandi og spilaði eins og sannur leiðtogi. Hann er svo flottur í vörninni að það er ómetanlegt þegar hann skilar líka í sóknarleiknum.

Elvar Már Friðriksson, bakvörður 3

13 stig á 25:21 mínútum (PlúsMínus: -7 Framlag: 13)

Byrjaði leikinn ekki vel og var mjög lengi í gang. Hvort sem það voru meiðslanna eða ekki þá var Elvar ekki líkur sjálfum sér framan í þessum leik. Skotin voru ekki sannfærandi og hann var að tapa boltanum allt of mikið. Hann kom hins vegar rosalega öflugur inn í endurkomunni í fjórða leikhlutanum og sýndi þá andlegan styrk sinn. 

Martin Hermannsson, bakvörður 4

10 stig og 6 stoðsendingar á 32:44 mínútum (PlúsMínus: -8 Framlag: 8)

Væntingarnar voru miklar til Martins fyrir mótið en meiðslin hafa greinilega tekið sinn toll á síðustu árum. Er ekki lengur alveg sami leikmaður og áður. Körfuboltagáfurnar eru enn til staðar og hann var alltaf að leita leiða til að hjálpa liðinu sínu. Skotin duttu því miður ekki og honum gengur mun verr að koma varnarmönnum úr jafnvægi sem hefur svo lengi verið hans sérgrein. Það sem var mun betra er að hann hélt alltaf áfram og fann leiðir til að skora og opna fyrir félagana.

Jón Axel Guðmundsson, framherji 4

5 stig á 23:56 mínútum (PlúsMínus: -8 Framlag: 3)

Byrjaði leikinn á löngum þrist en næstu skot á eftir gengu ekki og hann var síðan kominn í villuvandræði í fyrsta leikhluta. Tekur mikið til sín á báðum endum og lætur finna fyrir sér. Það er mikilvægt fyrir lið sem vantar oft sentimetra og kíló á mótherjanna. Hann var ekki að finna sig vel í sókninni en spilaði mjög vel í vörninni.

Tryggvi Snær Hlinason, miðherji 5

21 stig á 37:15 mínútum (PlúsMínus: -7 Framlag: 32)

Er að sýna öllum að hér á Evrópumótinu að hann er miðherji í allra fremstu röð. Pólverjar lokuðu vel teignum til að byrja með og Tryggvi náði ekki skoti á körfuna í upphafi leiks. Hann stimplaði sig aftur á móti inn með tveimur tröllatroðslum og það er gaman að sjá þegar Tryggvi er farinn biðja um boltann og klára vel í kringum körfuna. Tók yfir annan leikhluta og var kominn með 13 stig í hálfleik. Samvinna hans og Ægis var til fyrirmyndar.

Komu inn af bekknum

Kári Jónsson, bakvörður 4

5 stig á 17:16 mínútum (PlúsMínus:+4 Framlag: 2)

Það var gaman að sjá Kára koma svona sterkan inn. Hann hefur þurft að bíða eftir mínútunum sínum en er klár þegar kallið kemur. Kom inn með yfirvegun og útsjónarsemi. Setti niður fyrsta skotið sitt og var að búa til fyrir liðið.

Kristinn Pálsson, framherji 3

6 stig á 14:37 mínútum (PlúsMínus: -3 Framlag: 6)

Var ekki hitta vel fyrir utan í byrjun þrátt fyrir að fá nokkur opin skot en um leið og þristarnir detta stækkar hann um nokkra sentimetra og hávaðinn í íslensku áhorfendunum um tugi desíbela.

Orri Gunnarsson, framherji 3

4 stig á 7:00 mínútum (PlúsMínus: -4 Framlag:2 )

Var frystur í Belgaleiknum og virkaði mjög stressaður þegar hann kom inn í kvöld. Góða karfa fljótlega var því mjög mikilvæg. Var síðan enn grimmari í seinni hálfleiknum og skilaði sínu.

Sigtryggur Arnar Björnsson, bakvörður 1

0 stig á 2:47 mínútum (PlúsMínus: -4 Framlag: -2)

Byrjaði á því að gefa tvö víti í lok fyrsta leikhlutans og gerði lítið annað en brjóta af sér. Átti auðvitað þennan rosalega leik á móti Pólverjum fyrir stuttu síðan en þessi leikur gat ekki verið ólíkari.

Styrmir Snær Þrastarson, framherji 2

2 stig á 5:49 mínútum (PlúsMínus: -1 Framlag: 3)

Einn af orkuboltum liðsins. Hann skilar alltaf sínu í vörninni og lausu boltanum en í sóknarleiknum er hann ekki að nýta sína tækifæri.

Hilmar Smári Henningsson, bakvörður 2

2 stig á 4:51 mínútum (PlúsMínus: 3 Framlag: 0)

Fékk ekki að spila fyrr en í seinni hálfleik en var fljótur að koma sér á blað með góðri körfu. Kom inn með mikla baráttu og gaman að sjá dugnaðinn þær mínútur sem hann spilaði.

Craig Pedersen, þjálfari 4

Það þurfti mikið til að finna orku og trú í hópnum eftir svekkelsið í gær. Svarið var besti leikur liðsins þegar litið er á varnarleikinn. Auðvitað er það ekki á herðum þjálfarans þegar skotin detta ekki og liðið fékk vissulega góð skot í kvöld.

Gerði vel í að leyfa öllum að spila og halda öllum inn í leiknum. Fann leiðir ásamt þjálfaratymi sínu að koma íslenska liðinu aftur inn í leikinn. Því miður fékk hann ekki tækifæri til að setja upp sigursóknir í lokin.