Ein­kunnir á móti Ís­rael: Máttum ekki við svona hauskúpu­leik hjá Martin

Íslenska liðið hitti ekki vel en verst af öllu var að það vantaði ákefðina, orkuna og kraftinn þegar á móti blés í seinni hálfleiknum. Lykilmenn virkuðu þá þreytulegir og ef það er eitthvað sem má ekki vanta þá er það íslenska geðveikin.

Stærsta saga leiksins fyrir íslenska liðið var hins vegar frammistaða besta og reyndasta leikmanns liðsins. Martin Hermannsson átti því miður algjörlega hauskúpuleik. Hann hitti ekkert og hjálpaði lítið ekki síst þegar hann virtist missa kjarkinn og trúna í seinni hálfleik. Ísraelsmenn lögðu mikla áherslu á að loka á Martin og það gekk fullkomlega upp hjá honum.

Martin endaði með mínus framlag og fjórtán prósent skotnýtingu (2 af 14) í einum versta landsleik sínum á ferlinum. Það jákvæða að nú er eina leiðin upp á við.

Þjálfarateymið notaði lengstum bara átta menn en ein bjartasta vonin var innkoma hins unga Hilmars Smára Henningssonar í lokin. Það þurfti orku og sjálfstraust í sóknarleik íslenska liðsins og þessi ungi strákur sýndi að hann á skilið fleiri mínútur.

Það var mikið á herðum Tryggva Snæs Hlinasonar og hann skilaði flottum tölum. Hann var besti maður liðsins og ungir strákar átti ágæta spretta. Reynslumeiri leikmenn geta miklu betur og vita það best sjálfir.

Frammistöðumat íslensku leikmannanna í leiknum

Byrjunarliðið:

Elvar Már Friðriksson, bakvörður 3

17 stig á 30:20 mínútum (PlúsMínus: -18  Framlag: +15)

Stigahæstur í íslenska liðinu. Áræðinn og óhræddur eins og hann er þekktur fyrir. Leyfði ísraelsku vörninni aldrei að slaka á og var kominn með níu stig í fyrsta leikhluta. Hitti ekki vel og það hjálpaði ekki til í stoðsendingunum að skyttur íslenska liðsins voru heldur ekki að hitta.

Martin Hermannsson, bakvörður 1

4 stig á 29:07 mínútum (PlúsMínus: -25 Framlag: -2)

Gríðarleg vonbrigði enda var okkar besti maður mjög ólíkur sjálfum sér. Verst var að sjá líkamstjáninguna í seinni hálfleiknum. Klikkaði á sex fyrstu skotunum sínum en vera hans á vellinum opnaði vissulega mikið fyrir aðra því Ísraelsmenn lögðu ofurkapp á að loka á hann. Fyrsta karfan hans kom eftir fjórtán mínútur og var langþráð en breytti litlu. Klikkaði á níu af tíu skotum sínum í fyrri hálfleiknum og var ekki sannfærandi í vörninni. Það gekk ekkert og í seinni hálfleik þá reyndi hann lítið eins og hann væri búinn að sætta sig við að þetta væri ekki hans dagur.

Jón Axel Guðmundsson, framherji 3

8 stig á 27:41 mínútum (PlúsMínus: -24 Framlag: +5)

Var með betri leikmönnum íslenska liðsins. Lenti snemma í villuvandræðum en þorir alltaf að gera hlutina. Sækir á körfuna, sækir villur og sækir fráköst. Er líka fínn varnarlega og afar mikilvægur fyrir heildarjafnvægið í liðinu. 

Orri Gunnarsson, framherji 3

5 stig á 14:46 mínútum (PlúsMínus: -20 Framlag: +8)

Barðist vel og reyndi að nýta alla sína sentimetra í krefjandi aðstæðum út um allan völl. Ísraelar reyndu að sækja á hann ekki síst þegar þeir voru búnir að teyma Tryggva út úr teignum. Það var engin óskastaða en Orri var að gera ágætlega í frumraun sinni á stærsta sviðinu.

Tryggvi Snær Hlinason, miðherji 4

13 stig og 14 fráköst á 36:20 mínútum (PlúsMínus: -15 Framlag: +16)

Besti maður íslenska liðsins þótt það gengi alls ekki allt upp hjá honum. Var ekki að taka góðar ákvarðanir inn í teig í byrjun leiks og tapaði boltanum of oft. Óx ásmegin með hverri mínútu, náði tveimur tröllatroðslum og var kominn með 9 stig og 11 fráköst í hálfleik. Fékk tvær villur í fyrri hálfleik en slapp við þá þriðju. Lenti í vandræðum þegar Roman Sorkin fór að setja niður þrista en er auðvitað bestur inn í teig en ekki að hlaupa út í skyttur.

Komu inn af bekknum

Ægir Þór Steinarsson, bakvörður 2

0 stig á 17:39 mínútum (PlúsMínus: +3 Framlag: +1)

Kom inn með sinn kraft og baráttu auk þess að taka góðar og skynsamar ákvarðanir í sókninni. Vörnin lagaðist mikið þegar hann kom inn. Var að reyna að búa til hluti þegar Martin varð ragur og óákveðinn en hitti ekkert. Við elskum baráttuna og varnarleikinn en hann verður að bjóða upp á eitthvað meira í sóknarleiknum

Kristinn Pálsson, framherji 3

7 stig á 17:34 mínútum (PlúsMínus: +5 Framlag: +6)

Var fljótur að setja niður þrist og opna með því völlinn fyrir íslenska liðið. Íslenska liðið var í plús með hann inn á vellinum sem segir mikið um mikilvægi hans fyrir jafnvægið í liðinu

Styrmir Snær Þrastarson, framherji 3

8 stig á 12:00 mínútum (PlúsMínus: +17 Framlag: +13)

Kom vel inn í leikinn með góða orku. Grimmur á eftir öllum lausum boltum en helst til ragur í sókninni í fyrri hálfleik. Betra að sjá hann á þeim helmingi í seinni en við verðum að fá aðeins meira. Liðinu gekk þó betur með hann inn á gólfinu og hann skoraði góðar körfur í lokin.

Hilmar Smári Henningsson, bakvörður 4

9 stig á 3:20 mínútum (PlúsMínus: +5 Framlag: +11)

Ef það var einhver leikmaður íslenska liðsins sem öskrar á fleiri mínútur þá var það Hilmar. Hann kom seint inn á í fjórða leihklutanum en skoraði fjórar góðar og margs konar körfur á lokakaflanum.

Sigtryggur Arnar Björnsson, bakvörður -

0 stig á 4:33 mínútum (PlúsMínus: +6 Framlag: -2)

Almar Orri Atlason, framherji -

0 stig á 3:20 mínútum (PlúsMínus: +3 Framlag: -2)

Kári Jónsson, bakvörður -

0 stig á 3:20 mínútum (PlúsMínus:+3  Framlag: +2)

Craig Pedersen, þjálfari 2

Leikurinn var svo sem ágætlega lagður upp og eftir ágætan fyrri hálfleik var allt til alls til að gera eitthvað í seinni hálfleik. Hræðileg byrjun á seinni hálfleikinn skrifast þó að stórum hluta á þjálfarateymið. Liðið kom flatt inn í seinni hálfleikinn og henti frá sér alvöru möguleika á því að ná einhverju út úr þessum leik. Nú er að byggja liðið upp fyrir Belgaleikinn, dæla inn orku og trú í íslenska liðið.  Sú staðreynd að hann gat ekki notað Hilmar Smára meira er dæmi um þjálfara sem þarf að horfa meira til framtíðar en á það sem gerðist á síðustu árum.