Seðla­bankinn heldur stýri­vöxtunum ó­breyttum

Greint er frá ákvörðun peningastefnunefndar í yfirlýsingu sem birt var klukkan 8:30. Fyrir ákvörðunina hafði nefndin lækkað stýrivextina fimm sinnum í röð, en frá ágúst 2023 til ágúst 2024 voru stýrivextirnir 9,25 prósent áður en vaxtalækkunarferlið hófst. Allir nefndarmenn studdu þessa ákvörðun.

Í yfirlýsingu peningastefnunefndar segir að verðbólga hafi verið 4 prósent í júlí og minnkað um 0,2 prósentur frá mánuðinum á undan. 

„Samkvæmt nýbirtri spá Seðlabankans eykst hún aftur á næstu mánuðum en tekur síðan að hjaðna er kemur fram á næsta ár. Óvissa um verðbólguhorfur er þó áfram mikil.

Hægt hefur á vexti innlendrar eftirspurnar í takt við þétt taumhald peningastefnunnar. Spennan í þjóðarbúinu hefur því minnkað eins og sjá má á hægari umsvifum á húsnæðis- og vinnumarkaði. Enn virðist þó vera nokkur þróttur í efnahagsumsvifum, laun hafa hækkað mikið og verðbólguvæntingar mælast enn yfir markmiði.

Þótt verðbólga hafi hjaðnað og verðbólguvæntingar lækkað síðustu misseri er enn nokkur verðbólguþrýstingur til staðar. Þær aðstæður hafa því ekki skapast að hægt sé að slaka á núverandi raunvaxtaaðhaldi peningastefnunnar. Ljóst er að frekari skref til lækkunar vaxta eru háð því að verðbólga færist nær 2½% markmiði bankans.

Mótun peningastefnunnar næstu misseri mun sem fyrr ráðast af þróun efnahagsumsvifa, verðbólgu og verðbólguvæntinga,“ segir í yfirlýsingunni. 

Greiningardeild Landsbankans hafði spáð því að Seðlabankinn myndi halda stýrivöxtunum óbreyttum og raunar að þeir myndu ekki lækka meira á árinu. 

Næstu vaxtaákvörðunardagar Seðlabankans eru 8. október og 19. nóvember.

Kynning klukkan 9:30

Vefútsending með kynningu á yfirlýsingu nefndarinnar hefst klukkan 9:30.

Á kynningunni gera Ásgeir Jónsson, seðlabankastjóri og formaður peningastefnunefndar, Þórarinn G. Pétursson, varaseðlabankastjóri peningastefnu og Karen Áslaug Vignisdóttir, aðalhagfræðingur og framkvæmdastjóri sviðs hagfræði- og peningastefnu, grein fyrir yfirlýsingu peningastefnunefndar og kynna efni Peningamála.

Hægt verður að fylgjast með kynningarfundinum klukkan 9:30 í spilaranum að neðan.

Vextir verða því sem hér segir:

• Daglán 9,25%
• Lán gegn veði til 7 daga 8,25%
• Innlán bundin í 7 daga 7,50%
• Viðskiptareikningar 7,25%