Sante fer í hart við Heinemann

Þetta kemur fram í tilkynningu frá eigendum Sante, Elíasi Blöndal Guðjónssyni og Arnari Sigurðssyni.

Í tilkynningunni segir að áfengissala Fríhafnarinnar hafi verið ríkiseinkasala.

„Þrátt fyrir þetta hefur Heinemann, einkarekið fyrirtæki, nú gert samning við opinbera hlutafélagið Isavia um rekstur hefðbundinnar smásölu á áfengi á Keflavíkurflugvelli. Slíkur rekstur hefur enga lagastoð. Tollalög fjalla um rekstur tollfrjálsra verslana og hvaða vörur megi selja þar en fela ekki í sér undanþágu frá einkarétti hins opinbera til smásölu á áfengi. Löggjafinn hefur aldrei tekið til umræðu, hvað þá samþykkt, að heimila einkaaðilum að reka smásöluverslanir með áfengi,“ segir í tilkynningunni.

Elías og Arnar vilja meina að lögum hafi verið beitt með mismunandi hætti gagnvart þeim sem eiga í hlut.

„Aðrir sem reynt hafa að starfrækja löglega netverslun með áfengi hafa þurft að sitja undir rannsókn lögreglu og eiga nú yfir höfði sér ákæru. Á sama tíma hefur Heinemann fengið að reka sína starfsemi án afskipta þrátt fyrir að um sé að ræða augljóst lögbrot, í skjóli samnings við opinbert hlutafélag,“ segja þeir.

„Þetta jafngildir því að stjórnvöld hafi í framkvæmd afnumið einokun hins opinbera á smásölu á áfengi, en aðeins fyrir einn einkaaðila – Heinemann. Með þessu er komið á tvöföldu réttarkerfi þar sem einn aðili fær undanþágu sem öðrum er meinuð.“

Elías og Arnar segja að umrædd áfengissala Heinemann væri eins og ef einkaaðili í Reykjavík fengi að opna vínbúð og selja áfengi „í krafti leyfis sem stangast á við lög“ meðan öðrum væri umsvifalaust gert að loka.

„Enginn myndi sætta sig við slíkt misræmi, hvorki almenningur né aðrir atvinnurekendur. Sömu lög gilda á Keflavíkurflugvelli og í Reykjavík.“