Einvígið á Nesinu safnar í ár fyrir minningarsjóð Bryndísar Klöru

Óskar Ófeigur Jónsson skrifar 1. ágúst 2025 12:46

Bryndís Klara Birgisdóttir lést eftir að orðið fyrir hnífsstunguárás á Menningarnótt í fyrra. Dagbjartur Sigurbrandsson vann Einvígið á Nesinu í fyrra en hann er ekki með í ár. Vísir/Nesklúbbur

Nesklúbburinn verður með sitt árlega góðgerðarmót, Einvígið á Nesinu, á Frídegi verslunarmanna. Þetta í tuttugasta og níunda skipti sem það fer fram.

Mótið er haldið í samstarfi við Arion Banka en venju samkvæmt er nokkrum af bestu kylfingum landsins boðið til leiks og leika þeir að þessu sinni í þágu Minningarsjóðs Bryndísar Klöru.

Einvígið hefst stundvíslega klukkan eitt mánudaginn 4. ágúst. Fyrstu tvær holurnar verða leiknar með því sniði að sá fellur úr leik á fyrstu braut sem er fjærst holu eftir þrjú högg og tvö högg á annarri braut.

Eftir það verður farið í hið hefðbundna „shoot-out“, eða útsláttarkeppni, þar sem þau, sem eru með hæsta skor á viðkomandi braut, falla úr leik.

Arion Banki, styrktaraðili Einvígsins á Nesinu, veitir í mótslok forsvarsaðila Minningarsjóðs Bryndísar Klöru ávísun upp á eina milljón króna.

Keppendalistinn er klár en fjórar konur verða með í ár.

Sjö af kylfingunum tíu í ár hafa orðið Íslandsmeistari í golfi, þrír karlar (Aron Snær Júlíusson, Axel Bóasson og Haraldur Franklín Magnús) og fjórar konur (Guðrún Brá Björgvinsdóttir, Hulda Clara Gestsdóttir, Ragnhildur Kristinsdóttir og Perla Sól Sigurbrandsdóttir).

Aðeins tveir af kylfingunum hafa unnið Einvígið á Nesinu áður eða þeir Aron Snær Júlíusson (2015) og Haraldur Franklín Magnús (2020). Dagbjartur Sigurbrandsson vann í fyrra en hann er ekki með í ár.