Arion hagnaðist um tíu milljarða á öðrum fjórðungi

Þetta kemur fram í nýju uppgjöri bankans sem birt var í dag. Þar kemur fram að arðgreiðsla verði væntanlega helmingur af hagnaði, miðað við arðgreiðslustefnu bankans.

Meðal þess helsta sem kemur þar fram er að hagnaður hafi verið 9,8 milljarðar króna á öðrum ársfjórðungi og að arðsemi eiginfjár hafi verið 19,7 prósent. Á sama fjórðungi í fyrra var arðsemin 11,5 prósent.

Hagnaður á hlut var 6,59 krónur, samanborið við 3,86 krónur í fyrra.

Rekstrarkostnaður er sagður hafa svo gott sem staðið í stað milli ára en heildarkostnaður sem hlutfall af kjarnatekjum var 36,7 prósent. Í fyrra var það 46,2 prósent.

Á fyrstu sex mánuðum ársins hagnaðist Arion banki um 16,2 milljarða króna, samanborið við 9,9 milljarða á sama tímabili í fyrra.

Áhugasamir geta fundið frekari upplýsingar hér á vef Arion banka.

Viljayfirlýsing um samruna stór tíðindi

Í tilkynningu frá Arion er haft eftir Benedikt Gíslasyni, bankastjóra, að afkoma annars fjórðungs ársins hafi verið góð og umfram væntingar. Hún skýrist af ýmsum þáttum en hann segir mestu skipta að fjölbreytt starfsemi Arion samstæðunnar hafi gengið vel á nær öllum sviðum.

Þá segir Benedikt að stóru tíðindin af fjórðungnum séu vissulega viljayfirlýsing Arion banka og Kviku banka um samruna, sem undirrituð var þann 6. júlí.

„Viljayfirlýsingin felur í sér að hluthafar Kviku fá 26% hlut í sameinuðu félagi nái samruninn fram að ganga. Markmiðið er að til verði sterkt fjármálafyrirtæki sem býður heildstæða þjónustu fyrir viðskiptavini. Verði af samrunanum mun það efla þá fjármálaþjónustu sem sameinað félag veitir einstaklingum, fyrirtækjum og fjárfestum. Samruninn getur skapað tækifæri til breiðari tekjumyndunar, áhættudreifingar og aukins hagræðis í starfsemi sameinaðs félags og þar með á íslenskum fjármálamarkaði,“ segir Benedikt.