Lauma sér inn í út­farir og senda kirkjuvörðum fingurinn

Sumar íslenskar kirkjur eru orðnar miklu meira en bara kirkjur. Þær eru orðnar að ferðamannastöðum. Og það getur reynst þrautinni þyngri að flétta hefðbundnum helgistörfum í þeim kirkjum saman við mikinn áhuga ferðamanna. 

Þetta er raunin í Víkurkirkju í Mýrdal en greint var frá því í dag að þar hafi komið fyrir að erlendir ferðamenn taki ljósmyndir af syrgjandi aðstandendum á meðan þeir sækja útfarir í kirkjunni. Þar hefur ágengni ferðamanna gengið svo langt að björgunarsveitir sinna lokun við veg að kirkjunni á meðan útförum stendur. 

Heitar tilfinningar hjá ferðamönnum sem dvelja stutt

Grétar Einarsson kirkjuhaldari í Hallgrímskirkju, þeirri kirkju sem tekur við flestum fjölda ferðamanna á Íslandi, segir ferðamönnum geta fylgt mikil áskorun. „Við erum fyrst og fremst kirkja, þannig að helgihald og athafnir ganga alltaf fyrir öllu öðru. En þetta getur alveg verið áskorun. Þetta er gríðarlegur fjöldi af fólki sem hingað kemur, við erum að tala um hundruði þúsunda.“

Ýmist sé kirkjunni allri lokað þegar helgihald sé í gangi eða þá einungis kirkjuskipinu og segir Grétar það misjafnt hve tilbúnir ferðamenn séu í að hlýta lokuninni.

„Það kemur alveg fyrir að túristar séu að lauma sér inn í athafnir, það er brúðkaup og ansi oft útfarir. Það er þannig að við erum með dyravörslu þegar við lokum allri kirkjunni og líka þegar við þurfum að loka kirkjuskipinu, þannig að við sigtum inn.“

Þá hefur Grétar sjálfur staðið í dyravörslu og segir heitar tilfinningar oft ráða för hjá ferðamönnum, sem hann tekur þó fram að hagi sér upp til hópa vel.

„Ýmis samskipti þar sem dvelja svolítið með manni og eru erfið þegar þau koma, því eins og ég segi áreitið er gríðarlegt. Orðaskipti sem kannski eru ekki í hvorki guðs húsi né siðaðra manna húsi boðleg og fingramál sem kannski er miður boðlegra.“

Hann segist þó hafa samúð með ferðafólki sem dvelji hér í stutta stund. „Það er líka mikilvægt að hafa það í huga að margir ferðamenn sem koma í kirkju eru ekki bara að koma til að skoða kirkjuna, þeir eru líka að koma til að eiga sínar bænastund í kirkjunni eða eins og hér gerist með ljósberann skrifa niður sínar hugsanir eða eitthvað álíka.“