Innlent

Rembihnútur á þinginu en ör­þrifa­ráð ekki til um­ræðu

Rafn Ágúst Ragnarsson og Hallgerður Kolbrún E. Jónsdóttir skrifa
Sigmar Guðmundsson þingflokksformaður Viðreisnar segir hina umdeildu 72. grein þingskaparlaga ekki til umræðu meðal stjórnarflokkanna.
Sigmar Guðmundsson þingflokksformaður Viðreisnar segir hina umdeildu 72. grein þingskaparlaga ekki til umræðu meðal stjórnarflokkanna. Vísir/Anton Brink

Frumvarp um veiðigjöld er eitt á dagskrá Alþingis í dag og búast má við löngum og miklum umræðum. Þingflokksformenn mættu til vikulegs fundar með forseta þingsins í morgun og enn eru þinglokasamningar ekki í höfn. Þingflokksformenn segja rembihnút kominn á viðræðurnar sem sigldu í strand um helgina.

Þingfundur hófst í dag klukkan tíu eftir að hefðbundnum mánudagsfundi forseta með þingflokksformönnum lauk. Á fundinum hvatti Þórunn Sveinbjarnardóttir forseti Alþingis þingflokkana til að koma sér saman um þinglok en miðað við að veiðigjöldin eru ein á dagskrá í dag er ljóst að árangurinn sem þingflokksformenn tala um í samtölum við fréttastofu sé takmarkaður.

„Dagskráin ber þess merki að ekki hafa náðst hér samningar. En þar sem að stjórninni með sín hundrað mál hefur orðið nokkuð ágengt. Stjórnarandstæðan hefur alls ekki flækst fyrir þar sem að heil gomma er þegar orðin að lögum. Þá er einstaka atriði sem út af stendur og eru í ákveðnum hnút. En að mínu mati þarf ekki mikla lagni til að leysa,“ segir Hildur Sverrisdóttir, formaður þingflokks Sjálfstæðisflokksins, í samtali við fréttastofu.

Umræðan um umræðuna

Allir eru formenn þingflokkanna sammála um að einlægur vilji sé til staðar en þingfundur dagsins hófst á umræðum um fundarstjórn þar sem þingmenn stjórnar og stjórnarandstöðu tókust á um umræðuna um umræðuna um veiðigjöld.

Hildur Sverrisdóttir, þingflokksformaður Sjálfstæðisflokksins, tók fyrst til máls þegar þingfundur hófst klukkan tíu. Hver stjórnarandstöðuþingmaðurinn á fætur öðrum tók til máls á eftir henni, undir liðnum fundastjórn forseta, um það að ræða þurfi fleiri mál en veiðigjaldafrumvarpið.

Eiginleg umræða um frumvarpið hófst svo tuttugu mínútur í ellefu. Sex voru á mælendaskrá þegar umræða hófst, þar voru margir á leið í á fertugustu ræðu. Sá sem flestar ræður hefur haldið um málið á mælendaskrá er Njáll Trausti Friðbertsson. Hann mun taka til máls í 53. sinn um málið. Enginn stjórnarþingmaður er á mælendaskrá.

Vilja ekki þvinga atkvæðagreiðslu

Guðmundur Ari Sigurjónsson, formaður þingflokks Samfylkingarinnar, og Sigmar Guðmundsson, formaður þingflokks Viðreisnar, sögðu báðir að eðlilegast væri að leysa ágreiningsmál fylkinganna með atkvæðagreiðslu.

Sigmar Guðmundsson segir ekki það ekki til skoðunar að beita 71. grein þingskaparlaga en hún kveður meðal annars á um að forseti Alþingis eða níu þingmenn geti krafist þess að greidd séu atkvæði um það umræðulaust hvort umræðu skuli lokið og málið fært til atkvæðagreiðslu.

„Það eru þingsköp í gildi. Við erum ekki komin á þann stað að það sé verið að spekúlera í því,“ segir Sigmar.

Ingibjörg Isaksen tekur undir með formönnum þingflokka stjórnarflokkanna.

„Það er mikilvægt að semja um þinglok. Það er betra en aðrar leiðir því þannig hefur þetta alltaf verið gert,“ segir hún.


Tengdar fréttir

Formenn þingflokka halda spilunum þétt að sér

Þinglok eru hvergi í augsýn og þingflokksformenn halda spilunum þétt að sér. Þeir funda með forseta Alþingis áður en þingfundur hefst klukkan tíu en eina málið á dagskrá er veiðigjaldafrumvarpið.

Veiðigjaldið aftur í nefnd og viðræður komnar á lokametra

Veiðigjaldið er aftur á dagskrá á fundi atvinnuveganefndar í dag en fundurinn er hluti af þinglokaviðræðum. Samkvæmt heimildum fréttastofu eru viðræður á lokametrunum. Búist er við stuttum fundi sem hefst klukkan 17 í dag en þar verður farið yfir ákveðna útreikninga sem þingmenn deila um.




Fleiri fréttir

Sjá meira


×