Þegar gott slúður í vinnunni gerir gagn

Við erum þó að tala um ákveðna tegund af slúðri; Ekki þá tegund að það sé verið að baktala mann og annan.

Hér má þó ekki misskilja hlutina sem svo að verið sé að hvetja til slúðurs á vinnustöðum. Þvert á móti. 

Hins vegar er það staðreynd að slúður og kjaftagangur hefur fylgt manninum um ómunatíð og því er þetta fyrst og fremst samantekt um það, hvers konar slúður mögulega getur gert gagn.

Svona byrjar almennt slúður

Almennt, fara sögusagnir oft af stað innan vinnustaða þegar fólk upplifir að það sé verið að fela eða fegra einhvern sannleika. Fólk verður tortryggið og fer að kjafta sín á milli. 

Þetta gerist ekki síst þegar stjórnendahópurinn virðist ekki vera að segja „allt“ eða satt og rétt frá. Eða þegar starfsfólki finnst eins og yfirmaðurinn sé ekki að treysta þeim fyrir upplýsingum.

Fólk tengist líka oft í gegnum slúður; finnur sig samsvara sig því sem verið er að segja; að hópurinn sem slúðrar sé samstíga og sammála.

Slúður getur hins vegar verið mjög skeinuhætt og almennt þrífst það betur á vinnustöðum þar sem andrúmsloftið er almennt ekki mjög jákvætt né vinnustaðamenningin sterk.

Slúður þrífst líka vel þar sem þögli herinn er mjög sterkur, en um hann má lesa hér:

Gagnlegt slúður

Að nýta slúður og sögusagnir til góðs er ekki auðveld leið, en möguleg. Fyrst er að horfa svolítið á það, hvað gerist oft þegar slúðursögur fara af stað og nýta sér það jákvæða.

Til dæmis er það staðreynd að slúður býr til áveðið traust á milli fólks; Þeirra sem eru að slúðra.

Það sem einkennir gagnlegt slúður er þegar starfsfólk fær að vita eitthvað sem ekki er opinbert. Til dæmis sýna niðurstöður rannsóknar, sem birt var í Group and Organizational Management, að fólk er líklegra til að staldra lengur við á vinnustað þar sem því finnst það vera hluti af því að ,,vita sumt sem ekki allar vita.“

Þá sýna rannsóknir líka að það að deila með starfsfólki hlutlausum eða jákvæðum fréttum, sem þó má ekki opinbera, getur verið hið besta mál. Því það að fá þetta traust, er valdeflandi og tryggð starfsfólks gagnvart vinnustaðnum eykst.

Stjórnendur hafa þó fleiri leiðir til að gera slúður á vinnustað gagnlegt. En það er með því að fylla upp í eyðurnar á slúðursögunum með það að markmiði að tryggja að réttar upplýsingar komast í umferð.