Vill þyngja refsingar við líkams­árásum

Frá þessu segir á vef dómsmálaráðuneytisins. Þar kemur fram að það sé staðreynd að ofbeldisbrotum hafi fjölgað á Íslandi síðustu ár og að dómsmálaráðherra telji að brýnt sé bregðast við þeirri þróun. 

„Hluti af því er að endurskoða ákvæði almennra hegningarlaga, með það fyrir augum að skerpa á skilum milli ákvæða hegningarlaga um líkamsárásir og þyngja refsimörk.

Í dag má skipta hegningarlagaákvæðum í líkamsárás og meiriháttar líkamsárás. Hámarksrefsing fyrir líkamsárás er eins árs fangelsisvist en fyrir meiriháttar er hámarksrefsing 16 ára fangelsi.“ segir í tilkynningunni.

Haft er eftir Þorbjörgu Sigríði að ofbeldi sé meinsemd í íslensku samfélagi. Nauðsynlegt sé að bregðast skýrt við auknum ofbeldisbrotum og að refsingar við slíkum brotum endurspegli alvarleika þeirra. „Við sjáum sambærilega hluti vera að gerast á Norðurlöndunum og þar hafa stjórnvöld brugðist við. Það eru skýr skilaboð gagnvart þessari þróun að þyngja refsiramma fyrir líkamsárásir. Þess vegna hef ég beðið refsiréttarnefnd um að skoða þetta vel og skila mér tillögu til að bregðast við þessari alvarlegu stöðu,“ er haft eftir ráðherranum.