Belgar vörðu Evrópu­meistara­titilinn

Úrslitaleikurinn í ár var endurtekning frá mótinu 2023 þar sem Belgía vann sex stiga sigur á Spáni 64-58. Spánverjar höfðu því harma að hefna í kvöld en Belgar freistuðu þess að vinna mótið í annað sinn og sömuleiðis í annað skiptið í röð.

Það leit allt út fyrir að Spánverjar næðu að koma fram hefndum í ár en þegar rúmar fjórar mínútur voru til leiksloka var staðan 51-63 Spánverjum í vil. Talnaglöggir sjá í hendi sér að Belgar unnu síðustu fjórar mínúturnar 16-2 en þær komust þó ekki yfir fyrr en 18 sekúndur voru eftir með körfu frá WNBA leikmanninum Julie Allemand, sem var stigahæst Belga með 19 stig. Emma Meesseman, sem leikur fyrir Fenerbahce í Tyrklandi, átti einnig stórleik með 16 stig, ellefu fráköst og sjö stoðsendingar.

Eins og áður sagði var þetta annar Evrópumeistaratitill Belga. Spánverjar hafa unnið Evrópumeistaramótið fjórum sinnum en Sovétríkin höfðu á sínum tíma algjöra yfirburði og unnu mótið 21 sinnum í 22 tilraunum í röð og á árunum 1960-1991 einokuðu þau titilinn.