Ráðist á rútubílstjóra og veg­far­endur yfirbuguðu á­rásar­manninn

Þetta kemur fram í dagbók Lögreglunnar á höfuðborgarsvæðinu um verkefnin gærkvöldsins og næturinnar frá 17 í gær til 5 í morgun.

Lögreglu barst tilkynning um að bíl hefði verið stolið úr bílasölu í Árbænum. Bíllinn fannst skömmu síðar þar sem þjófurinn ók á honum um miðborgina. Þjófurinn var stöðvaður, handtekinn og vistaður í fangaklefa í þágu rannsóknar málsins.

Fleira var um að vera í Árbænum en þar var ökumaður stöðvaður vegna gruns um að hann æki undir áhrifum fíkniefna. Við leit í bílnum fundust fíkniefni í meira magni en telst sem neysluskammtur og auk þess var töluvert af reiðufé á manninum. Auk þess að vera grunaður um fíkniefnasölu gat maðurinn ekki framvísað gildum ferðaskilríkjum og því mögulega hér á landi í ólöglegri dvöl.Maðurinn var handtekinn og vistaður í fangaklefa.

Hraðakstur, árekstur og stútar

Lögreglan þurfti einnig að eiga við þónokkra ökumenn sem óku of hratt en alls voru fjórtán kærðir fyrir hraðakstur, sem náði allt frá 118 km/klst upp í 161 km/klst, bæði á Suðurlandsvegi og Reykjanesbraut þar sem hámarkshraðinn er 90 km/klst.

Sá sem hraðast ók fór á rúmlega tvöföldum hámarkshraða, 185 km/klst, á Reykjanesbraut og var hann sviptur ökuréttindum og sektaður. Annar ók á 163 km/klst á Suðurlandsvegi, sinnti ekki stöðvunarmerkjum lögreglu og reyndi að komast undan. Hann gaf sig þó að lokum og stöðvaði bílinnn eftir stutta eftirför. Auk hraðakstursins er ökumaðurinn grunaður um akstur undir áhrifum áfengis og var handtekinn í þágu rannsóknar málsins.

Þá barst lögreglunni tilkynning um bíl sem hafði verið ekið á skilti og annað ökutæki í hverfi 108. Þegar lögregla kom á vettvang kom í ljós að ökumaðurinn virtist ekki í ökuhæfu ástandi og var handtekinn. Ökumaðurinn var fluttur á lögreglustöð og vistaður í fangaklefa í þágu rannsóknar málsins.

Fimm ökumenn til viðbótar voru grunaðir um akstur undir áhrifum áfengis og/eða fíkniefna víðsvegar um höfuðborgarsvæðið. Allir voru þeir handteknir og mál þeirra unnin eftir venjubundnu ferli.

„Ásamt ofangreindu sinnti lögreglan ýmis konar verkefnum á tímabilinu þar sem óskað var eftir aðstoð lögreglu meðal annars vegna skemmdarverka, þjófnaðar, heimilisófriðs, einstaklings sem hafði læst sig úti, sprautunála á víðavangi, slysa, hópamyndun ungmenna, ölvaðra einstaklinga, vísa aðilum úr húsnæði, umferðaóhappa, hávaðakvartana og fleira,“ segir í dagbók lögreglunnar.