Veiðigjöld ekki á dag­skrá þingfundar í dag

Frumvarp um veiðigjöld er ekki á dagskrá þingfundar sem á að hefjast á Alþingi nú klukkan tíu. Þingfundi var ítrekað frestað síðdegis í gær og í gærkvöldi á meðan þingflokksformenn funduðu þar sem leitað er leiða til að semja um þinglok. 

Líkt og undanfarna daga hafa það helst verið þingmenn stjórnarandstöðunnar sem rætt hafa veiðigjaldafrumvarpið, en Þorgerður Katrín Gunnarsdóttir utanríkisráðherra og formaður Viðreisnar, kvaddi sér hljóðs um fundarstjórn forseta á meðan á umræðunni stóð í gær.

„Virðulegur forseti, þetta eru búnir að vera langir dagar og það er mikið álag á háttvirtum þingmönnum, og það tekur á. Það tekur á okkur öll sem erum hér í húsinu til þess að starfa fyrir land og þjóð.“

„Það hafa þung orð verið látin falla í því máli sem er hér til umræðu á báða bóga, og það hafa jafnvel orð skvesst á einstaklinga sem hafa bara alls ekki átt það skilið. Það finnst mér miður,“ sagði Þorgerður Katrín í gær.

Þingflokksformenn funduðu þar til klukkan var að ganga eitt í nótt og munu halda viðræðum áfram eftir hádegi í dag. Samkvæmt heimildum fréttastofu er ágætis gangur í viðræðunum og er dagskrá dagsins í dag sögð til marks um „góða trú“ af hálfu stjórnarflokkanna um að ná samkomulagi með því að hafa veiðigjöld ekki á dagskrá í dag.