Vega­gerðin vill hjörtun burt

Í bréfi Vegagerðarinnar til ráðsins segir að ábendingar um að hjörtun ógni umferðaröryggi hafi borist. Málið hafi verið  tekið til skoðunar innanhúss hjá Vegagerðinni og ljóst er að hjartalöguð umferðarljós standast hvorki kröfur um umferðarmerki né umferðaröryggi. Akureyri.net vakti fyrst athygli á málinu. 

Þá segir í bréfinu að af öryggisástæðum og til að fyrirbyggja hugsanleg slys fari Vegagerðin því fram á að hjörtun verði fjarlægð úr umferðarljósum sem tilheyra stofnuninni.

Ljósin dragi athygli annað

„Rauðu hjörtun í umferðarljósum á Akureyri eru vinsælt myndefni ferðamanna. Oft má sjá ferðamenn á miðeyjum fjölfarinna vegamóta taka myndir og sjálfur. Við aðstæður sem þessar geta skapast hættur ef til dæmis fólki skrikar fótur og lendir fyrir bíl.

Einnig er hætta á því að hjartalaga umferðarljós dragi athygli ökumanna frá akstri, en það er sérstaklega varhugavert á fjölförnum vegamótum,“ segir í bréfinu.

Í fundargerð skipulagsráðsins síðan í gær segir að ráðið fresti afgreiðslu á málinu.

Umferðarljósin hafa vakið lukku bæði innlendra og erlendra ferðamanna í gegnum tíðina. Stórleikarinn Will Smith vakti til að mynda athygli á því í fyrra að ljósin væru snilldaráminning. „Ísland er alveg með þetta. Elska þetta,“ sagði hann um ljósin.