„Búið að vera ó­mann­legt á­lag á þeim síðustu tíu mánuðina“

Þetta var í fyrsta sinn síðan árið 2016 sem úrslitin í NBA ráðast í oddaleik eða leik sjö. Oklahoma tók á móti Indiana Pacers en jafnræði var á með liðunum til að byrja með en í stöðunni 16-16 sleit Haliburton hásin.

Skelfileg meiðsli Tyrese Haliburton sem er helsta sjarna Indiana Pacers. Hásin slitin. Þetta var of mikið fyrir Pacers og OKC vann leikinn að lokum 103-91.

„Þeir voru besta liðið í allan vetur og eru með besta leikmanninn sem tekst að afreka það að vera verðmætasti leikmaður deildarinnar og úrslitaeinvígisins og stigahæsti leikmaður deildarinnar. Þeir eru byggðir til að vera eitt besta lið deildarinnar næstu árin,“ segir Hörður Unnsteinsson í Sportpakkanum á Sýn í gærkvöldi. Þarna talar Hörður um Shai Gilgeous-Alexander sem hefur átt stórkostlegt tímabil fyrir OKC.

„Ég tengi ekki alveg við hann sem súperstjörnu alveg strax. Hann er Kanadamaður líka sem hefur kannski áhrif á stjörnukraftinn hans. Ég held því að það séu margir í Bandaríkjunum sem tengi ekkert sérstaklega við hann. Ég veit að það voru mjög margir svekktir að Indiana Pacers hefðu tapað þessum leik.

Hásinameiðsli í úrslitakeppninni í NBA hafa verið mikil í ár en þeir Jason Taytum, Damian Lillard og Haliburton slitu allir hásin á síðustu vikum. Merkileg staðreynd að þeir spila allir í treyju númer 0.

„Hann hafði byrjað svo vel og var kominn með þrjár þriggja stiga körfur í byrjun leiksins. Það stefndi í svakalegan leik hjá honum þannig að það var katóstrófískt að missa hann þarna út strax í byrjun leiksins. Það væri auðvelt að segja að þetta væri tengt álaginu á þeim, að þeir væru að spila mikið. Þeir spila 82 leiki og fara svo inn í úrslitakeppni. Tveir af þessum mönnum voru að spila á Ólympíuleikunum síðasta sumar þannig að þetta er búið að vera ómannlegt álag á þeim síðustu tíu mánuðina. Þetta gæti tengst því en talan núll er held ég bara fyndin tilviljun.“