Um helmingur sérbýla kostar meira en 150 milljónir

Fasteignamarkaðurinn hefur verið við stofuhita í ár, samkvæmt mismunandi mælikvörðum HMS. Fjöldi kaupsamninga og verðþrýstingur hefur verið í samræmi við meðaltal síðastliðinna tíu ára, en nýjar íbúðir seljast þó verr en aðrar íbúðir. Þetta, og meira, kemur fram í nýrri mánaðarskýrslu HMS.

Þar kemur einnig fram að fasteignasalar telji umsvif á fasteignamarkaði lítil í júní og á valdi kaupenda þessa stundina. Á sama tíma er aukinn eftirspurnaþrýstingur á leigumarkaði, á bæði langtíma og skammtíma. Það séu vísbendingar um að umsvif á skammtímaleigumarkaði geti orðið meiri í sumar samanborið við síðustu tvö sumur.

Í samantekt skýrslunnar segir einnig að á lánamarkaði hafi hrein ný lántaka verið mjög lítil hjá bönkunum í apríl, þriðja mánuðinn í röð, þar sem álíka mikið var greitt upp af óverðtryggðum lánum og tekið var að láni í nýjum hreinum verðtryggðum lánum.

Aftur á móti hafi hrein ný lántaka verið töluverð hjá lífeyrissjóðunum. Veðsetningarhlutföll hjá lífeyrissjóðum séu almennt lægri en hjá bönkum en á móti komi að heimilin búi að talsverðum sparnaði þar sem innlán heimila hafa aukist umfram ráðstöfunartekjur á síðustu misserum.

Þá kemur einnig fram að á byggingarmarkaði hafi fjárfesting aukist í íbúðarhúsnæði um tæpan fimmtung að raunvirði í fyrra eftir að hafa dregist saman árið 2023. Að jafnaði störfuðu 5,4 prósent fleiri í byggingariðnaði í fyrra var en árið 2023 en dregið hefur úr fjölgun starfsfólks í greininni í ár sem þó er bundin talsverðum árstíðasveiflum.

Fimm prósent íbúða sérbýli

Í skýrslunni er sérstaklega fjallað um sérbýli á höfuðborgarsvæðinu en aldrei hefur verið jafn lítið byggt af sérbýlum. Sérbýli nær utan yfir einbýli, raðhús og parhús, en ekki hæðir í fjölbýli með sérinngangi. Einungis fimm prósent íbúða á höfuðborgarsvæðinu sem komu inn á markað síðasta ári voru í sérbýlum. Af mælaborði íbúða í byggingu má sjá að innan við tíu prósent allra íbúða í byggingu á höfuðborgarsvæðinu eru íbúðir í sérbýlum eða 301 af 3721.

Í byrjun nóvember 2019 voru álíka mörg og eru í dag, eða í kringum 370 sérbýli til sölu á höfuðborgarsvæðinu. Aftur á móti voru í kringum 1.700 íbúðir í fjölbýlum til sölu á höfuðborgarsvæðinu í nóvember 2019, samanborið við rúmlega 2.400 íbúðir í dag.

Á sama tíma fyrir ári voru álíka eða í kringum 370 sérbýli til sölu en þá voru um 56 prósent þeirra verðlögð á undir 150 milljónir króna. Í dag er hlutfall þeirra í kringum 53 prósent, en 47 prósent sérbýlishúsa eru verðlögð yfir 150 milljónir króna.

Í mars, apríl og maí hefur undirvísitala sérbýlis á höfuðborgarsvæðinu að meðaltali verið í 111 stigum, en undirvísitalan var að meðaltali í 102,8 stigum á sama tímabili í fyrra. Verð á sérbýlum á höfuðborgarsvæðinu hefur því hækkað um átta prósent á milli vormánaða 2024 og 2025, en til samanburðar hækkaði undirvísitala fjölbýlis á höfuðborgarsvæðinu um fimm prósent á sama tíma.

Umsvif á skammtímaleigumarkaði álíka mikil og í fyrra

Alls voru um 7.400 eignir skráðar á skammtímaleiguvefnum Airbnb á öllu landinu í apríl þar sem helmingur eignanna staðsettur á höfuðborgarsvæðinu og hinn helmingur utan þess. Airbnb skráningar í síðastliðnum aprílmánuði voru 3,5% fleiri en í aprílmánuði árið 2024. Alls eru um 5,5 prósent færri Airbnb-eignir í apríl miðað við sama mánuð árið 2019.

Greina má augljósar árstíðarsveiflur á síðustu árum sem ná hámarki yfir sumartímann þegar ferðamenn koma til landsins í miklum mæli. Airbnb-eignum fjölgaði töluvert á milli mánaða í apríl síðastliðnum, en haldi þeim áfram að fjölga á sama hraða og á síðustu árum má búast við að umsvif á skammtímaleigumarkaði verði meiri í sumar en síðustu tvö sumur.

Í nágrenni höfuðborgarsvæðis helst fjöldi Airbnb-eigna óbreyttur á milli ára á sama tíma og þeim fjölgar um þrjú prósent annars staðar á landsbyggðinni. Airbnb-eignum fjölgar mest á höfuðborgarsvæðinu, en þar nemur fjölgunin um fimm prósent á milli aprílmánaða 2024 og 2025.