Burns enn efstur og stefnir á sinn fyrsta

Sam Burns var í efsta sætinu þegar hann fór af stað á hinum erfiða Oakmont golfvelli í Pennsylvaníu en skiptist oft á forystunni við J.J. Spaun.

Spaun endaði hringinn hins vegar á skolla og missti efsta sætið. Hann er nú jafn Adam Scott í öðru sætinu, þremur höggum undir pari.

Bæði Burns og Spaun eru í leit að sínum fyrsta risamótstitli og hinn 44 ára gamli Scott hefur aðeins einu sinni unnið risamót, fyrir tólf árum síðan.

Viktor Hovland er svo í fjórða sætinu, höggi undir pari, og Carlos Ortiz í fimmta sætinu, á pari. Aðrir kylfingar eru yfir pari.

Stórstjörnur hafa verið í miklum vandræðum á mótinu, sem er leikið við erfiðar veður- og vallaraðstæður. Mikil rigning setti svip sinn á keppnina í gær. 

Efsti kylfingur heimslistans, Scottie Scheffler, er fjórum höggum yfir pari en þó ekki neðar en í ellefta sæti. Ríkjandi meistari mótsins og nýkrýndur PGA meistaramótssigurvegari, Bryson DeChambeau, er úr leik. Rory McIlroy, sem vann Masters mótið nýlega, er tíu höggum yfir pari í 49. sæti.

Lokadagur Opna bandaríska fer fram í dag og verður í beinni útsendingu á Sýn Sport Viaplay frá klukkan þrjú.