Heitir Vals­menn fara á toppinn með sigri

Valsmenn náðu aðeins í stig gegn nýliðum Vestra á heimavelli í 1. umferð og gerðu svo jafntefli við ungt lið KR í 2. umferð. Í 5. umferð fékk liðið skell í Kaplakrika og var sæti Túfa orðið heitt. 

Síðan þá hefur liðið unnið fjóra af fimm leikjum sínum. Eina tapið kom gegn Íslandsmeisturum Breiðabliks á Kópavogvelli.

Þó það sé ekki við markvörðinn Stefán Þór Ágústsson að sakast þá er allt annað að sjá liðið með Frederik Schram milli stanganna enda einn besti markvörður deildarinnar. Sem stendur hafa aðeins Vestri og Víkingur fengið á sig færri mörk en Valur. 

Það er hins vegar fjöldi skoraðra marka sem vekur hvað mesta athygli. Þegar 10. umferðir eru búnar hafa Valsmenn skorað 22 mörk. Aðeins skemmtikraftarnir í KR hafa skorað fleiri en eða 28 talsins. 

Danski markahrókurinn Patrick Pedersen hefur skorað 9 mörk til þessa, Tryggvi Hrafn Haraldsson er með fimm, Jónatan Ingi Jónsson þrjú og Lúkas Logi Heimisson tvö. Þá hafa Birkir Heimisson og Aron Jóhannsson skorað eitt hvor.

Endurkoma Birkis eftir að spila með Þór Akureyri í Lengjudeildinni á síðustu leiktíð hefur breytt miklu fyrir Valsliðið. Ásamt því að gefa liðinu aukinn kraft á miðsvæðinu – þrátt fyrir að spila mikið í bakverði - þá hefur Heimir lagt upp fjögur mörk á leiktíðinni ef marka má tölfræðiveituna Wyscout. Enginn leikmaður Bestu deildarinnar hefur lagt upp fleiri mörk.

Með sigri í dag fer Valur, um tíma að minnsta kosti, upp i toppsætið. Eitthvað sem erfitt var að sjá fyrir þegar fimm umferðir voru búnar.

Leikur Stjörnunnar og Vals hefst klukkan 19.15. Bein útsending Sýnar Sport hefst klukkan 19.00.