Turnarnir svínvirka en fegrunar­að­gerðir í far­vatninu

Nokkuð hefur verið fjallað um varðturnana, sem fólk hefur deilt um hvort telja megi forláta eða forljóta. Þannig hefur lögreglan sagt að turnunum sé ætlað að hafa fælingarmátt gagnvart vasaþjófum, sem hafa að undanförnu gert sig gildandi á fjölförnum stöðum í borginni. Aðrir hafa sagt turnana hlægilega ljóta, til að mynda arkítekt sem fréttastofa ræddi við.

Hvað sem útliti turnanna líður virðast þeir þjóna tilgangi sínum, sem er að draga úr vasaþjófnaði þar sem þeir standa, prýðilega. 

Engar tilkynningar frá því turnarnir fóru upp

Í samtali við Vísi segir Guðmundur Pétur Guðmundsson lögreglufulltrúi að engar tilkynningar hafi borist um vasaþjófnað frá því turnarnir voru reistir um þarsíðustu helgi.

„Það getur vel verið að það læðist inn eitthvað með tímanum, en síðan turnarnir fóru upp hef ég ekki fengið vasaþjófnaðartilkynningu til mín,“ segir Guðmundur.

Takið þið þessu þá sem merki um að turnarnir séu að svínvirka?

„Já. Það er auðvitað stuttur tími liðinn, en já, þetta lofar góðu.“

Til skoðunar að fegra turnana

Guðmundur segist vel meðvitaður um umræðu á þá leið að turnarnir séu forljótur umhverfislegur ófögnuður.

„Ég var búinn að gefa það til kynna að þetta mætti alveg líta betur út. Það var bara verið að reyna að stöðva þá blæðingu sem varð þarna. En það stendur nú til að fegra þá. Þetta er svona tilraunaverkefni í sumar. Það er komin tillaga frá eiganda turnanna, sem er fyrirtækið Vörn, um að láta þá líta aðeins betur út.“

Slík tillaga fara í gegnum hönnunardeild hjá borginni, en Guðmundur gerir ráð fyrir að hún verði samþykkt.

„Þá verða límdar einhverjar filmur á með öðruvísi áferð, þannig að þetta líti öðruvísi út og fellur betur inn í umhverfið. Við sjáum til með það, en stór hluti af þessu er líka að vera sýnilegur og hrinda frá. Nú á bara eftir að koma í ljós hvort þessir vasaþjófar færi sig einhvert annað, jafnvel í önnur sveitarfélög. Það er alþekkt að þegar lögregla beitir meira eftirliti á ákveðnum stöðum þá færast afbrotin annað. Það á bara eftir að koma í ljós.“

Gæti þá verið von á því að það dúkki upp fleiri turnar, víðar um borgina?

„Þetta eru nú aðalstaðirnir. Þarna er mesti mannfjöldinn. Við erum með myndavélar annars staðar í bænum þar sem fólk er að koma saman, en þær eru alls ekki jafn sýnilegar. Enda hefur gefist meiri tími til að hanna þær,“ segir Guðmundur.