Gömul strætó­skýli verði nýtt sem „byttebox“

Tillaga umhverfis- og skipulagssviðs um verkefnið var samþykkt á fundi umhverfis- og skipulagsráðs fyrr í vikunni. Til stendur að kanna hvort hægt verði að nýta gömul strætóskýli sem tekin hafa verið úr notkun til verkefnisins.

Í tillögunni segir að hugmyndafræðin að baki verkefninu sé sambærileg þeirri sem liggur að baki Fríbúðinni í Gerðubergi, það er að hægt sé að skiptast á smærri nytjahlutum án greiðslu. Horft væri til færanlegrar aðstöðu sem væri staðsett í nágrenni grenndarstöðvar.

Fram kemur að fyrirmynd verkefnisins eru svokölluð „byttebox“ til dæmis í Árósum og Álaborg í Danmörku.

„Reynslan t.d. í Árósum er jákvæð og notkun skýlanna aukist jafnt og þétt. Umgengi hefur verið ásættanleg, en vissulega þarf umsjón og rekstur með stöðinni. Fyrir liggur vilyrði Sorpu bs. um að að þrifateymið sem heldur utan um grenndarstöðvar í borginni sjái um stöðvarnar.

Unnið er að útfærslu í samstarfi við Borgarhönnun og rekstur og umhirðu borgarlandsins um útfærslu á lausn í Reykjavík, til dæmis hvort hægt sé að nýta strætóskýli sem hafa verið tekin úr notkun. Áætlaður stofnkostnaður hvert eitt box er um 1,5 milljón en rekstarkostnaður er metinn óverulegur,“ segir í tillögunni.