Hreifst af Stíg: „Finnst þarna komið þetta Víkings-element“

Eftir að Víkingar misstu frá sér tvo frábæra kantmenn, þegar Ari Sigurpálsson og Danijel Dejan Djuric héldu utan í atvinnumennsku í vetur, hafa vonir verið bundnar við Stíg sem í vetur sneri heim frá Ítalíu eftir tvö og hálft ár erlendis.

Stígur skoraði sitt fyrsta mark fyrir Víkinga á laugardaginn og átti mjög góðan leik eins og sjá má í þessu broti úr Stúkunni á Stöð 2 Sport.

„Við höfum aðeins verið að gagnrýna hann. Þetta er náttúrulega ungur strákur. En þetta var besta frammistaða sem ég hef séð til hans hingað til. Mér fannst hann mjög góður í þessum leik,“ sagði Arnar Grétarsson og bætti við að Stígur, Helgi Guðjónsson og Valdimar Þór Ingimundarson hefðu verið bestu menn Víkings gegn ÍA. Arnar hélt áfram að ræða um Stíg:

„Það sem ég er mest hrifinn af… Oft er það þannig með unga gutta sem koma heim að þeir eru „soft“ – ætla bara að gera það fína. En eins og þessi klippa sýnir þá er hann áræðinn og grimmur. Hann skorar mark í leiknum,“ sagði Arnar og hélt áfram að benda á þá góðu hluti sem sjá mátti hjá Stíg í leiknum.

„Mér finnst þarna komið þetta Víkings-element sem hefur verið í kantmönnum hjá þeim. Þar sem þeir eru agressívir og vinnusamir en ekki bara að skora mörk og leggja upp. Þeir eru partur af því þegar liðið bregst við að hafa tapað boltanum og núna finnst mér ég farinn að sjá það [hjá Stíg].“