Ein­hleypir aug­lýstir á óhefð­bundnum stefnumótaviðburði

Oddur Ævar, fréttamaður Stöðvar 2, kíkti við á Loftið og ræddi við Írenu Pálsdóttur, einn skipuleggjanda viðburðarins.

Hvað er að fara að gerast hérna í kvöld?

„Við erum að fara að halda Pitch or Ditch í kvöld hérna á Loftinu og verðum með Powerpoint-sýningu. Fólk sem á vini sem eru einhleypir koma og gera Powerpoint-sýningu um þessa einhleypu vini. Við erum með fullan sal af fólki og fullt af þeim eru á lausu,“ segir Írena.

Fólk er að fara að tala um kosti og galla sinnar manneskju?

„Allan pakkann. Það er frá aldri yfir í galla, áhugamál, skóla, allt saman,“ segir Írena.

Ellefu álitlegir kostir

Alls verða glærusýningar fyrir ellefu einhleypu einstaklinga.

Var ekkert mál að fá fólk til að skrá sig?

„Það er ekkert mál, fólk var endalaust að senda inn og svo voru nokkrir sem duttu út,“ segir hún.

Hvað fær fólk mikinn tíma á mann?

„Við ætlum að hafa svona fimm mínútur á mann, sumir aðeins lengur og það er ekkert mál.“

Ef einhvern langar að kíkja núna þá er nægur tími?

„Það er alveg nægur tími, þetta verður til 22 í kvöld á Loftinu,“ segir Írena sem hvetur fólk til að kíkja við og taka þátt í stemmingu.

Segjum sem svo að ég komi hingað og mér lítist vel á einhvern. Hvernig segi ég viðkomandi að ég vilji deit með honum?

„Vertu gamaldags, labbaðu upp að manneskjunni og talaðu við hana!“ segir Írena sem bætir þó við að í kynningunum verði upplýsingar um samfélagsmiðla viðkomandi þar sem hægt er að hafa samband.