Óskars­verð­launa­leik­stjórinn Robert Benton látinn

New York Times greinir frá því að hann hafi látist á heimili sínu á Manhattan í New York á sunnudaginn.

Benton var einn af virtustu kvikmyndagerðarmönnunum í Hollywood og sló í gegn sem handritshöfundur kvikmyndarinnar Bonnie og Clyde frá árinu 1967 sem skartaði þeim Warren Beatty og Faye Dunaway í aðalhlutverki.

Hann leikstýrði og skrifaði handritið að kvikmyndinni Kramer vs. Kramer árið 1979 með þeim Dustin Hoffman og Meryl Streep í aðalhlutverkum. Myndin varð tekjuhæsta mynd þess árs og vann til fimm Óskarsverðlauna, þar með talið bestu mynd. Benton sjálfur hlaut tvenn Óskarverðlaun, annars vegar fyrir bestu leikstjórn og hins vegar besta handrit.

Hann hlaut svo aftur Óskarsverðlaun árið 1984 fyrir handritið að kvikmyndinni Places in the Heart sem hann leikstýrði einnig. Myndin var tekin upp á æskuslóðum Benton, Waxahachie í Texas, og skartaði þeim Sally Field, John Malkovich, Ed Harris og Danny Glover í aðalhlutverkum.

Benton leikstýrði ellefu kvikmyndum á 35 árum og kom sú síðasta út árið 2007, Feast of Love.

Eiginkona Benton til sextíu ára, Sallie Benton, lést árið 2023. Hann lætur eftir sig soninn John Benton.