Myglu­laust, ein­angrandi og hag­kvæmt byggingar­efni

Steinullareiningar eru framleiddar með því að líma saman pressaða steinull á milli tveggja 0,6 mm GreenCoat stálklæðninga. Þessi samsetning gerir einingarnar tilvaldar sem endanlegt yfirborð þaks, útveggja og innveggja. Hægt er að fá einingar með mismunandi völsunum sem henta hverju verkefni og í tíu mismunandi litum.

Íslensk framleiðsla fyrir íslenskar aðstæður

„Við byrjuðum á framleiðslu steinullareininga á Flúðum árið 2016 þegar við byggðum nýja verksmiðju sem fór í gang sama ár,“ segir Gísli Símonarson, nýr forstöðumaður byggingardeildar hjá Límtré Vírneti. 

„Áður höfðum við framleitt steinullareiningar í Reykholti í frumstæðari vél en í nýju verksmiðjunni höfum við 100 metra langa framleiðslulínu þar sem stálplötur eru límdar utan á harðpressaða steinull til að mynda steinullareiningar í réttri þykkt og lengd eftir þörfum hvers verkefnis. Viðtökurnar hafa verið góðar frá fyrsta degi og einingarnar haf staðist allar væntingar og meira til.“

Hann segir einingarnar m.a. henta vel í klæðningar á útveggi og þök. „Það á bæði við um byggingar byggðar úr límtré eða stálgrind. Eðli eininganna gerir þær að tilvöldu byggingarefni í t.d. þök sem erfitt er að lofta en einingarnar mynda samloku sem er í senn rakavörn, einangrun og veðurkápa. Varmatap er mjög lítið gegnum einingarnar enda lítið um kuldabrýr þegar hús eru klædd með steinullareiningum utan á límtrésgrind.”

Frábær lausn í þak, veggi og milliveggi

Þegar búið er að klæða bygginguna með þessum hætti er búið að loka því alveg og engin þörf á frekari klæðningum. Steinullareiningarnar má líka nota í milliveggi og loft og þar með er komin brunaþéttingu á milli rýma. „Í milliveggjum náum við allt að 90 mínútna brunaþoli í steinullareiningum , hvort sem notast er við standandi eða liggjandi einingar en það fer bara eftir því hver lofthæðin er og lögun rýmisins, hvort hentar betur. Þessar einingar eru líka myglulausar og endingargóðar og einstaklega hagkvæmar miðað við annað byggingarefni.“

Fjölbreyttur hópur viðskiptavina

Helstu viðskiptavinir Límtrés Vírnets þegar kemur að steinullareiningum eru verktakar af öllum stærðum og gerðum og svo rekstraraðilar í landbúnaði. „Þannig eru steinullareiningarnar nýttar m.a. í fjós, hesthús, fjárhús, reiðhallir, kjúklingahús, geymslur, ýmis iðnaðarhús og í laxeldi svo fátt eitt sé nefnt. Steinullareiningarnar hafa líka verið notaðar í íbúðarhúsnæði, t.d. í bæði þök og veggi á íbúðarhús og blokkir hérlendis. Steinullareiningar nýtast í margar tegundir bygginga og væri hægt að nýta þær mun víðar en gert er í dag og geta m.a. leyst leka- og mygluvandamál víða.”