Amman hand­leggs­brotin eftir hundsbit með barna­barnið í göngu­túr

Karítas Eldeyjardóttir, dóttir konunnar og móðir ungbarnsins, rekur atburðarásina í samtali við fréttastofu. 

„Ég er heima þegar mamma hringir og biður mig um að hlaupa út af því að hún hafði verið bitin af husky rétt hjá. Ég er komin innan við mínútu síðar og þá er hún með augljósa áverka á hægri hendi og það blæðir,“ segir Karítas.

Þurfti lítið til að hundurinn gerði áhlaup

Eldey, móðir hennar, hafði þá haldið út í göngutúr með eins og hálfs árs dótturdóttur sína í kerru og hundinn Lego, af maltese-tegund, í bandi. Meðan hún gekk um grófan malarstíg hafi hún komið auga á husky-hund í bandi. Á augabragði hafi hann hlaupið af stað og slitið sig úr bandinu.

„Bandið slitnar strax, hann hefur ekkert fyrir því,“ segir Karítas.

Husky-hundurinn hafi hlaupið beint í átt að maltese-hundinum, sem hafi hlaupið hring í kring um kerruna og flækst í henni. Þá hafi amman gripið í ólina á husky-hundinum. 

Í tilraun hennar til að koma barnabarninu og maltese-hundinum undan með því að ýta við kerrunni hafi husky-hundurinn bitið hægri framhandlegg hennar til blóðs.

Amman hafi kallað í eigandann, í fyrstu án árangurs. 

„Því miður leið allt of langur tími frá því að hundurinn sleppur þar til eigandinn kemur út. Hún kallar, að mér skilst, án árangurs og þarf að sækja hundinn,“ segir Karítas. 

Í framhaldinu Karítas sjálf mætt á svæðið. Amman hafi verið flutt með sjúkrabíl, fengið stífkrampasprautu og sýklalyf, og í ljós komið að hún væri handleggsbrotin. Svo illa að hún þarf að gangast undir aðgerð eftir helgi. 

„Þannig að þetta hefur verið ágætisbit hjá hundinum.“

Hún segir sláandi að husky-hundurinn hafi ekki þurft meira áreiti en að sjá konu með smáhund, sem gaf ekki frá sér nein hljóð, til að gera áhlaup.

Heppni að hundurinn sótti ekki í barnið

Karítas segist ekki bera kala til eiganda hundsins, slysin geti gerst. Hún gerir ákall eftir umræðu um hvort leggja ætti skyldu á hundaræktendur að upplýsa kaupendur um eðli og þarfir hunda af tegundum á borð við husky og sheffer, áður en þeir eru afhentir. 

„Svo það sé ekki verið að afhenda fólki dýr án þess að það átti sig á hvað það er með í höndunum.“

Þá veltur hún því upp hvort gera ætti mætingu eigenda slíkra hunda á hundaþjálfunarnámskeið að skyldu. 

Hún segir umræðu hafa myndast á Facebook hópnum Hundasamfélaginu vegna atviksins, þar sem fólki þykir miður að verið sé að tala niður umræddar hundategundir.

„Það var ekki meiningin en aftur á móti eru þetta tegundir sem geta valdið miklum skaða. Það er ekki hægt að bera þær saman við minn litla, til dæmis,“ segir Karítas.

„Maður heyrir allt of margar sögur af hundsbitum, hvað þá þegar það eru börn, og við þökkum guði fyrir að hundurinn hafi ekki sýnt barninu áhuga. En mér finnst ég þurfa að vekja athygli á þessu.“