Íslenski boltinn

Grind­víkingar ætla að spila í Grinda­vík í sumar

Ingvi Þór Sæmundsson skrifar
Grindvíkingar eru byrjaðir að gera Stakkavíkurvöll kláran fyrir fótboltasumarið.
Grindvíkingar eru byrjaðir að gera Stakkavíkurvöll kláran fyrir fótboltasumarið. grindavík

Þrátt fyrir jarðhræringar á svæðinu ætlar Grindavík að spila heimaleiki sína í Lengjudeild karla í sumar í Grindavík.

Í færslu á Facebook greindu Grindvíkingar frá því að byrjað væri að slá Stakkavíkurvöll, heimavöll Grindavíkur, til að gera hann kláran þegar keppni í Lengjudeildinni hefst.

Í færslunni segir að völlurinn komi ágætlega undan vetri og spretta á honum sé með ágætum. Völlurinn verður svo gataður og sandaður á næstunni.

Grindavík mætir Selfossi á útivelli í 1. umferð Lengjudeildarinnar föstudaginn 2. maí. Viku seinna er svo komið að fyrsta heimaleiknum, gegn Fjölni.

Grindvíkingar léku í Safamýri á síðasta tímabili þar sem ekki var hægt að leika á Stakkavíkurvelli vegna jarðhræringa.

Á þriðjudaginn hófst eldgos nálægt Grindavík. Um var að ræða ellefta eldgosið á Reykjanesskaga síðan 2021 og það áttunda á Sundhnúksgígaröðinni. Bærinn var svo rýmdur í kjölfarið en íbúum var hleypt aftur inn í bæinn eftir að gosinu lauk.


Tengdar fréttir

Ætla að spila í Grinda­vík: „Ábyrgð mín að koma liðinu heim“

„Við erum Grind­víkingar og eigum að spila heima,“ segir for­maður knatt­spyrnu­deildar Grinda­víkur sem hefur tekið fyrsta skrefið í átt að heim­komu í ár. Félagið hefur skráð Stakka­víkur­völl í Grinda­vík sem heima­völl sinn fyrir komandi tíma­bil.




Fleiri fréttir

Sjá meira


×