McIlroy meiddur í að­draganda Masters

McIlroy hafnaði í fimmta sæti á Houston Open um helgina, sæti sem hann náði í með glimrandi lokahring þar sem hann lék á sex höggum undir pari vallar. Því náði hann þrátt fyrir að glíma við eymsli í olnboga. Hann leggur nú allt kapp á að ná sér góðum fyrir Masters-mótið eftir tæpar tvær vikur.

„Hægri olnboginn hefur verið að angra mig aðeins. Líklega fæ ég meðhöndlun til að vera viss um að ég verði í lagi fyrir Augusta,“ sagði McIlroy í samtali við Golf Channel.

„Ég funda með þjálfaranum mínum, Michael Bannon, í vikunni. Við munum vinna í þessu og sjá til þess að ég verði í standi,“ segir Norður-Írinn enn fremur.

Masters-mótið er eina risamótið sem McIlroy hefur ekki unnið á ferli sínum. Hann eltist því af áfergju við að klæðast græna jakkanum. Hann getur orðið sjötti kylfingurinn sem fagnar sigri á öllum fjórum risamótunum. Hinir fimm eru Tiger Woods, Jack Nicklaus, Ben Hogan, Gary Player og Gene Sarazen.

McIlroy komst næst því að vinna árið 2011 þegar hann leiddi fyrir lokahringinn en gaf þá forystu eftir. Hann lenti þá í öðru sæti á eftir Scottie Scheffler fyrir þremur árum.

McIlroy hefur farið vel af stað á þessu ári og vann Players meistaramótið fyrir tveimur vikum síðan eftir bráðabana.

Masters-mótið fer að venju fram á Augusta-vellinum í Georgíu, dagana 10.-13. apríl. Mótið verður sýnt á rásum Stöðvar 2 Sport.