Halda tíu tíma maraþontón­leika

Fyrstu tónleikarnir hófust klukkan tólf í dag en allir tíu munu fara fram á 12 tónum á Skólavörðustíg. Hljómsveitin verður að allt til klukkan tíu í kvöld og á heila tímanum hefja meðlimir spilun á nýjustu breiðskífu þeirra, Allt sem hefur gerst. Hverjir tónleikar taka um þrjátíu mínútur og plötusnúðar og aðrir gestir sjá um að halda uppi stuðinu milli tónleika. Þetta verða því tíu tímar af stanslausri tónlist.

Bjarni Daníel Þorvaldsson, einn meðlima Supersport!, segir hljómsveitina hafa viljað halda stóra tónleika en skortur sé á góðum stærri tónleikastöðum.

„Við hugsuðum frekar að fara inn í okkar uppáhalds litla rými og blása skalann út þar í samræmi við það sem við vildum gera. Þannig við ætlum að spila plötuna okkar tíu sinnum í gegn frá tólf til tíu í kvöld,“ segir Bjarni Daníel. 

Hljómsveitin hefur áður spilað á þrennum tónleikum sama daginn.

„Þá urðu þeir alltaf betri þegar leið á daginn. Þannig það verður gaman að komast að því hvort það komi tímapunktur þar sem það hættir að verða staðan og þetta fari að versna. Svo jafnvel hvort það batni aftur. Það kemur í ljós,“ segir Bjarni Daníel. 

Nái einhver að sitja alla tíu tónleikana eru verðlaun í boði.

„Verðlaunin eru tilbúin en við vitum ekki til þess að einhver sé búinn að melda sig á öll giggin tíu. En við sjáum til. Ef það gerist, þá veit ég ekki hvað ég geri. En það verða verðlaun,“ segir Bjarni Daníel.