Fótbolti

Þor­leifur á æfingu hjá upp­eldis­félaginu

Runólfur Trausti Þórhallsson skrifar
Þorleifur Úlfarsson í leik með Houston Dynamo í Bandaríkjunum.
Þorleifur Úlfarsson í leik með Houston Dynamo í Bandaríkjunum. Vísir/Getty

Breiðablik, ríkjandi Íslandsmeistari karla í fótbolta, er um þessar mundir í æfingaferð erlendis. Í myndbandi af æfingu liðsins má sjá Þorleif Úlfarsson, uppalinn Blika, sem hefur undanfarin ár spilað í Bandaríkjunum og Ungverjalandi.

Það styttist í að Íslandsmótið í fótbolta fari af stað og eru mörg lið Bestu deildar karla að leggja lokahönd á leikmannahópa sína fyrir sumarið. Liðin slá aldrei hendi á móti góðum liðsstyrk og ef til vill hafa Blikar rambað inn á einn slíkan nú.

Hinn 24 ára gamli Þorleifur er uppalinn Bliki þó hann hafi um tíma leikið með Stjörnunni þegar hann var í 2. flokki. Hann á að baki einn leik í efstu deild hér á landi fyrir ríkjandi Íslandsmeistara en lék annars með Víking Ólafsvík meðan hann var í bandaríska háskólaboltanum.

Þar stóð hann sig nægilega vel til að vera valinn í nýliðavali MLS-deildarinnar af Houston Dynamo árið 2022. Í febrúar á síðasta ári samdi hann við Debrecen í Ungverjalandi en frá og með febrúar á þessu ári hefur hann verið samningslaus.

Nú verður að koma í ljós hvort Þorleifur sé að æfa með Blikum til að halda sér í standi eða hvort Íslandsmeistararnir séu enn að leita sér að liðsstyrk fyrir komandi tímabil.

Íslandsmeistarar Breiðabliks opna Bestu deild karla árið 2025 þegar Afturelding mætir á Kópavogsvöll þann 5. apríl næstkomandi.




Fleiri fréttir

Sjá meira


×