Morðtilræði, vændi og frændi sagður drepinn fyrir komuna til Ís­lands

Mæðgurnar eru frá ótilgreindu landi í Afríku. Frásögn konunnar af aðdraganda komu hennar til landsins er vægast sagt rosaleg.

Konan yfirgaf Afríkulandið einungis sextán ára gömul en hún segir að þar hafi hún búið við erfiðar aðstæður og meðal annars sætt kynfæralimlestingum sem barn. Frá Afríkulandinu hafi hún farið til annars ótilgreinds lands en þar virðist hún hafa eignast kærasta. Sá mun hafa neytt hana í vændi. Konan hafi búið við það ástand í um það bil eitt og hálft ár, en það muni hafa haft bæði djúpstæð og neikvæð áhrif á hana.

Elti hana og reyndi svo að ráða af dögum

Síðan tókst konunni að flýja til Ítalíu upp á sitt einsdæmi. Kærastinn mun þó hafa elt hana þangað og þröngvað sér aftur í líf hennar. Á Ítalíu hafi konan því búið við alvarlegt heimilisofbeldi af hálfu þessa kærasta, en hann hafi einnig reynt að þvinga hana í vændi þar.

Konan hafi hins vegar neitað að stunda vændi. En viðbrögð kærastans hafi verið þau að hann reyndi að ráða hana af dögum árið 2021.

Konan varð fyrir miklum líkamlegum skaða vegna morðtilræðisins, en hún mun hafa dvalið á spítala í hálft ár. Fram kemur að konan beri sjáanlega áverka eftir þessa morðtilraun um allan líkamann, enda hafi verið um að ræða ákaflega grófa árás.

Fyrrverandi kærastinn fékk tíu ára fangelsisdóm vegna árásarinnar árið 2022.

Bróðir kærastans hafi drepið móðurbróðurinn

Þá segir konan að kærastinn fyrrverandi hafi verið meðlimur í afrísku glæpagengi. Í kjölfar fangelsisdómsins hafi aðrir meðlimir gengisins því haft í hótunum við konuna og fjölskyldu hennar.

Þessi glæpasamtök eru sögð með stöðu mafíu á Ítalíu, og að þau hafi mikil ítök þar í landi.

Eftir að kærastinn hlaut dóm hafi kærastinn komið því í kring að móðurbróðir konunnar yrði myrtur af bróður kærastans. Þar að auki óttast konan nú að móðir hennar hafi hlotið sömu örlög og móðurbróðirinn, en hún hafi ekki heyrt í henni í lengri tíma.

Í dómnum segir að í málinu liggi fyrir gögn um ofbeldi og ofsóknir sem konan hefur sætt. Í einhverjum tilfellum sé einungis við hennar eigin frásögn að styðjast, en dómur kærastans fyrir manndrápstilraunina liggur fyrir.

Hins vegar eru ekki gögn til staðar sem styðja frásögn hennar af drápinu á móðurbróðurnum. Það er mat dómsins að sú frásögn sé þó „trúverðugri en ella“í ljósi gagna um banatilræðið gegn henni. Því verði að teljast eðlilegt að konan hafi ástæðu til að óttast um öryggi sitt og fjölskyldu sinnar á Ítalíu.

Almennt í verri stöðu

Konan sótti um alþjóðlega vernd hér á landi í maí 2023. Frá ítölskum yfirvöldum bárust þær upplýsingar að henni hefði verið veitt alþjóðleg vernd þar í landi.

Það var á þeim forsendum, að hún væri með alþjóðlega vernd annars staðar, sem Útlendingastofnun komst að þeirri niðurstöðu að ekki ætti að taka umsókn konunnar og dóttur hennar, sem er eins til tveggja ára gömul, um alþjóðlega vernd á Íslandi fyrir. Kærunefnd útlendingamála staðfesti síðan þá niðurstöðu.

Héraðsdómur hins vegar sagði að miklar líkur væru á því að staða konunnar á Ítalíu væru almennt verri en hjá fólki sem nýtur alþjóðlegrar verndar þar. Konan væri í sérstökum ástæðum sem mæltu til þess að rétt væri að taka umsókn hennar til efnismeðferðar.

Þá væri augljóst að hagsmunir dótturinnar væru að fá samhliða niðurstöðu og móðirin og því mun hún líka fá efnismeðferð.