Stjórn Vals segir Gylfa hafa sýnt liðsfélögunum van­virðingu

Yfirlýsing knattspyrnudeildarinnar var birt í stuðningsmannahópi Vals þar sem stuðningsfólk er upplýst um stöðu mála. Þar segir að ekki hafi staðið til að selja Gylfa í vetur þrátt fyrir áhuga annarra liða.

Líkt og Vísir greindi frá í morgun samþykkti Valur tilboð frá bæði Víkingi og Breiðabliki í gærkvöld. Gylfi féllst svo á tilboð Víkinga.

Ákvörðunin sé umdeild og hún hafi ekki verið auðveld en ekki hafi annað verið hægt eftir framgang Gylfa síðustu daga.

Gylfi átti ekki sinn besta leik er Valur mætti ÍA í Lengjubikarnum um helgina, en þá hafði hann og hans fólk beðið um sölu frá félaginu.

Í yfirlýsingunni segir að framkoma Gylfa í leiknum hafi verið á þann veg að ekki hafi verið unnt að halda samstarfinu áfram.

„Í síðustu viku fór af stað atburðarrás í kjölfar þess að Gylfi og hans fólk tjáðu okkur að hann vildi fara frá félaginu,“ segir í yfirlýsingunni.

„Í kjölfarið sýndi Gylfi bæði liðsfélögum sínum og félaginu öllu mikla vanvirðingu með frammistöðu sinni þegar hann bar fyrirliðabandið í síðasta leik gegn ÍA. Það var ekki sá Gylfi sem við þekkjum. Það var mat stjórnar eftir samtöl við leikmenn og aðila í kringum hópinn að með þessari framkomu hefði orðið ákveðinn trúnaðarbrestur milli leikmannsins og hópsins,“ segir þar enn fremur.

Valsmenn líti svo björtum augum fram veginn. Liðið verði styrkt enn frekar og vonir séu settar við meidda leikmenn sem eru að snúa til baka.

Yfirlýsinguna má sjá í heild að neðan.

Yfirlýsing knattspyrnudeildar Vals

Kæru Valsmenn.

Líkt og fram hefur komið í fjölmiðlum samþykktum við í stjórn knattspyrnudeildar tilboð sem bárust í Gylfa Þór Sigurðsson leikmann okkar í gær. Voru það tilboð frá bæði Víking Reykjavík og Breiðablik. Víkingur og Gylfi Þór náðu síðan saman um kaup og kjör og er því ljóst að Gylfi er ekki lengur leikmaður Vals.

Í tilefni þessa og þeirrar umræðu sem mun nú fara af stað teljum við mikilvægt að þið stuðningsmenn séuð upplýstir um okkar sjónarmið í málinu. Við gerum okkur grein fyrir því að þessi ákvörðun er umdeild og hún var ekki auðveld.

Mikilvægast er að hafa í huga að það er enginn leikmaður sem spilar fyrir Val stærri en félagið okkar. Valur er í okkar huga stærsta og sigursælasta íþróttafélag landsins sem státar af árangri sem öll önnur íþróttafélög landsins öfunda okkur af.

Þrátt fyrir áhuga annarra liða stóð ekki til að selja Gylfa Þór í vetur. Gylfi er frábær leikmaður og karakter og hefur verið frábær í alla staði eftir að hann kom til okkar.

Í síðustu viku fór af stað atburðarrás í kjölfar þess að Gylfi og hans fólk tjáðu okkur að hann vildi fara frá félaginu. Í kjölfarið sýndi Gylfi bæði liðsfélögum sínum og félaginu öllu mikla vanvirðingu með frammistöðu sinni þegar hann bar fyrirliðabandið í síðasta leik gegn ÍA. Það var ekki sá Gylfi sem við þekkjum. Það var mat stjórnar eftir samtöl við leikmenn og aðila í kringum hópinn að með þessari framkomu hefði orðið ákveðinn trúnaðarbrestur milli leikmannsins og hópsins.

Í okkar huga var því ekkert annað í stöðunni en að hámarka það sem félagið gat fengið fyrir leikmanninn. Í kjölfarið komu síðan tvö ásættanleg tilboð frá Breiðablik og Víking Reykjavík sem náði síðan samkomulagi við Gylfa eftir að við gáfum þeim leyfi til þess að ræða við leikmanninn.

Við teljum okkur vera með einn sterkasta hópinn í deildinni og það er afar mikilvægt að fjölga leikmínútum okkar leikmanna, sem hafa verið frá vegna meiðsla. Við höfum fengið flottar styrkingar inn í liðið í vetur og ætlum okkur að styrkja liðið frekar. Framundan er spennandi tímabil þar sem við erum m.a. í evrópukeppni og liðið hefur æft vel í vetur og leikmenn sem hafa verið frá eru að koma til baka.

Nú er það strákanna í liðinu, og okkar allra í Val, að snúa bökum saman og sýna fólki hversu öflugt félag við erum.

f.h. stjórnar knattspyrnudeildar Vals

Björn Steinar Jónsson