Ólík­legt að hægt verði að opna Holta­vörðu­heiði í dag

Spáð er hratt versnandi veðri á landinu í dag og taka appelsínugular veðurviðvaranir gildi í öllum landshlutum síðdegis. Slæmt veður var einnig í gærkvöldi og var þjóðveginum um Hellisheiði lokað. 

Vegirnir um heiðina og Þrengsli voru opnaðir aftur upp úr klukkan fimm í morgun samkvæmt vef Vegagerðarinnar. Óvissustig verður á vegunum frá hádegi vegna veðursins þar til klukkan 15:00 á morgun og gæti þeim verið lokað með skömmum fyrirvara.

Sama á við um fjölda annarra vega um allt land í dag og fram á morgundaginn.

Veður á að versta hratt suðvestanlands milli klukkan 13:00 og 15:00 og litlu síðar annars staðar á landinu samkvæmt ábendingu frá veðufræðingi Vegagerðarinnar til vegfarenda. Til að byrja með verður hríð á fjallvegum og flughálka þegar leysir.

Spáð er sunnan 20-28 m/s seinni partinn og í kvöld. Staðbundnir sviptivindar gætu náð 50 m/s, meðal annars á norðanverðu Snæfellsnesi, í Hvalfirði, norðan Skarðsheiðar, á Öxnadalsheiði og víða á Austfjörðum.