Klaka­stykki stórskemmdi bíl

Hróar Björnsson er svili eiganda bílsins. Hann segir að bílnum hafi verið lagt beint fyrir utan Laufengi 11 í Grafarvogi, um það bil tveimur metrum frá aðalinnganginum.

Eigandinn hafi bara ætlað að hoppa inn í kvöldmat og drífa sig svo aftur út.

„En svo eftir um það bil fimmtán mínútur heyrum við svakalega dynki, þung hljóð. Þá hafði klakastykki runnið af þakinu og beint á bílinn,“ segir Hróar.

Hann segir að bíllinn hafi orðið fyrir verulegum skemmdum, framrúðan sé mölbrotin, toppurinn beyglaður og framendinn líka.

Hróar hvetur fólk til þess að hafa varann á og líta sér nær, en hann segir lán í óláni að stykkið hafi ekki fallið á gangandi vegfaranda.