Verk­föllum kennara af­lýst sam­þykki deilu­aðilar til­lögu ríkis­sátta­semjara á laugar­dag

Ástráður segir í lögum sé gert ráð fyrir því að sáttasemjari megi leggja fram miðlunartillögu sem gengur svo beint til atkvæða hjá deiluaðilum. Samninganefndir taki þannig ekki afstöðu heldur félagsfólk.

„Þessi tillaga er ekki þannig tillaga,“ segir Ástráður. Hann hafi gert tillögu til samninganefndanna og leggi til að þær samþykki þetta. Ástæðan fyrir því að hann hafi ekki lagt fram miðlunartillögu sé að það séu efnisleg atriði í tillögunni sem eigi ekki heima í miðlunartillögu.

Nú þurfi samninganefndir deiluaðila að samþykkja tillöguna, geri þau það verði hún að kjarasamningi verður svo kosið um.

Ástráður segir að í tillögunni sé gert ráð fyrir því að launahækkanir gangi fram eftir merki markaðarins, í samræmi við það sem hefur verið samið um hjá öðrum.

Deiluaðilar hafi deilt um samning frá 2016 um að jafna kjör og laun og Ástráður segir viðræður ekki hafa sýnt neinn árangur. Deilan hafi haldið áfram fram eftir hausti án þess að það væru nokkur merki um að umræðan væri að þroskast.

Hann hafi gert tillögu í nóvember um aðferðarfræði þar sem hann lagði til að þau tækju tvo mánuði til að ræða virðismatið og hvernig ætti að nálgast það. Það myndi þá fara fram einhvers konar mat á virði starfa svo hægt sé að nálgast það markmið að jafna launin og kjörin.

Gert ráð fyrir eingreiðslu

Ástráður segir að í tillögu hans sé þessi munur á milli markaða viðurkenndur og gert ráð fyrir því að launagreiðandi fallist á að greiða inn á þessa vegferð launabreytingar sem feli í sér að það sé viðurkenning á því að þetta sér verkefni sem þarf að vinna. Í meginatriðum sé verið að samþykkja að skipta um aðferðarfræði og reyna aðra leið til að jafna laun og kjör kennara við aðrar stéttir en hefur verið reynd frá árinu 2016. Í tillögunni felist eingreiðsla til kennara sem eigi að vera skref í þessa átt.

Ástráður vill ekki fara út í tillöguna í smáatriðum. Það sé eðlileg kurteisi að samninganefndir hafi færi á að kynna þær fyrir sínu fólki. Málið sé ekki frágengið en það sé partur af tillögunni að ef þessi nýja aðferðarfræði er ekki að ganga þá geti deiluaðilar hætt við og farið aftur í fyrri aðferðarfræði eða fundið nýja leið.

Ástráður segist byggja á því samkomulagi sem gert var í nóvember. Tillagan sé framhald á því. Hann hafi sýnt aðilum hvað hann sé að hugsa í vikunni og þau haft samráð.

„Ég finn að þetta mál er þungt í öllum herbúðum,“ segir Ástráður. Allir aðilar telji eitthvað ekki nægilega gott en hann telji þetta lausnina sem geti leitt þau út úr „þeim vítahring“ sem þau eru komin í.

Friðarskylda samþykki þau tillöguna

Ástráður segir erfitt að halda uppi jákvæðum samræðum þegar fólk er komið í aðgerðaham en hann hafi boðað til fundar á laugardag klukkan 13. Samþykki deiluaðilar þessa tillögu jafngildi það því að skrifa undir kjarasamning og þá sé komin á friðarskylda og verkföllum verði frestað. Deiluaðilar hafi þá nokkrar vikur til að greiða atkvæða um kjarasamninginn.

Ástráður segir ekki hægt að leysa kjaramál í eitt skipti fyrir öll en hann viti enga betri leið til að ná friði um grunnlaunasetningu kennara en aðferðina sem hann er að leggja til. Hann segir að ef það gangi vel geti þetta verið fyrirmynd fyrir aðra að virðismati.

Verði tillagan ekki samþykkt segir Ástráður að þau haldi áfram að leita nýrra leiða. Ef verkföll byrja og það hefjast deilur um lögmæti og framkvæmd þeirra þá skapi það ekki rými fyrir góðar samningaviðræður. Hann segir verkföll lögmæta aðferð til að knýja fram betri kjör og hann ætli ekki að dæma þær aðferðir sem eru notaðar hverju sinni.