Efnaslys varð í grunn­skóla í Reykja­nes­bæ

Útkallið barst frá starfsmönnum Háaleitisskóla í Ásbrú í Reykjanesbæ þegar korter vantaði í hádegi og þá hafði brúsi með ertandi hreinsi efni á kaffiaðstöðu kennara gefið sig með þeim afleiðingum að heilsuspillandi var að draga þar andann. Efnið hafði þá lekið um gólf byggingarinnar.

Rúnar Eyberg Árnason, varðstjóri hjá Brunavörnum Suðurnesja, segir að efnið sem um ræðir hafi verið mjög ertandi fyrir slímhúð og augu.

Ein álma skólans var rýmd og voru tveir efnakafarar sendir út til að þynna efnið út með vatni og hreinsa upp ásamt því að innsigla efnabrúsann sem brást, ásamt öðrum sem farið var á að sjá, í eiturefnapoka.

Rúnar segir að aðgerðir hafi gengið vel og að slökkviliðsmennirnir hafi verið farnir af vettvangi um hálftvö. Þó tekur hann fram að aldrei sé farið geyst þegar eiturefni eru annars vegar.

„Þá er allt gert í rólegheitunum og öryggi er númer eitt, tvö og þrjú,“ segir hann.

Sú álma skólans sem útsett var fyrir eiturgufunum var loftræst og segir Rúnar að við taki ítarleg hreinsun.