Út­göngu­bann í borginni í nótt

Fyrstu eldarnir kviknuðu á þriðjudaginn. Mjög hvasst hefur verið á svæðinu og breiddust eldarnir því hratt út. Heilu hverfin eru nú rústir einar. Tíu eru látnir og yfir tíu þúsund hús hafa brunnið. Hátt í tvö hundruð þúsund manns hafa þurft að flýja heimili sín. Dröfn Ösp Snorradóttir Rozas, sem hefur búið í Los Angeles í fimmtán ár, segir nokkurn ótta meðal íbúa.

„Það hafa oft verið eldar hérna síðan ég flutti hingað en ég hef aldrei fundið fyrir jafn mikilli hættu og ótta frá öllum sem ég þekki. Það eru allir á nálum sem ég þekki og þessu er ekki lokið og það er nefnilega það versta við þetta. Svo náttúrulega var Kenneth eldurinn sem að byrjaði í gær og það var íkveikja. Þannig að þetta er ófremdarástand í borginni.“

Eldarnir loga á nokkrum stöðum. Dröfn býr í norðausturhluta borgarinnar í Highland Park eða aðeins fimmtán kílómetrum frá upptökum Eaton eldsins. Stór hraðbraut nærri húsinu hennar hefur hingað til náð að koma í veg fyrir að eldurinn hafi náð að heimili hennar og þá hefur hjálpað að vindáttin hefur snúist. Hún segir síðustu daga hafa verið erfiða.

„Fyrstu tvo dagana þá var bara svört aska. Við fundum það strax þegar eldsupptökin byrjuðu þá gátum við varla sofið inni hjá okkur fyrir ösku og reykjarlykt og sváfum með grímu.“

Margir hafi misst allt sitt og eigi um sárt að binda.

„Við eigum núna fimmtán vini sem eru gjörsamlega búnir að missa allt.“

Töskurnar tilbúnar ef þau þurfa að flýja

Þau hjónin hafa fengið skilaboð um að vera tilbúin að fara ef rýma þarf svæðið.

„Ég er með töskurnar mínar pakkaðar tilbúnar ef að ég fæ skipun um að yfirgefa. Gögnin í bílnum mínum sem eru mikilvæg, vegabréf og afsalið af húsinu og það allt saman en svona fatnaður og dótarí er hér. Svo þarf maður náttúrulega að passa upp á að það sé ekki sýnilegt af því síðan eru komnir glæpamenn sem eru byrjaðir að brjótast inn í hús og stela dóti hjá fólki því að mannkyninu er stundum er ekki bjargandi. Maður er svolítið vonlaus í augnablikinu.“

Útgöngubann verður í nótt í ákveðnum hverfum borgarinnar til að koma í veg fyrir þjófnað. Dröfn segir nýja elda enn verið að kvikna og óvíst hvenær ástandið batni en gert er ráð fyrir áframhaldandi hvössu og þurru veðri.

„Það náttúrulega kviknaði eldur í Hollywood sem var hræðilegur. Ef það kviknar í Griffith Park sem er í miðjunni á Hollywood þar sem Hollywoodskiltið er þá í raun og veru er voðinn vís og þá brennur öll borginni niður til grunna. Maður getur ekki slakað á því að það er bara svo random hvenær næsti eldur getur kviknað. Maður getur í raun og veru ekki slakað á fyrr en þessu er bara lokið.“