Pulis skelli­hló er hann gerði grín að ís­lensku eig­endunum

Pulis hefur ekki alltaf verið vinsæll meðal Íslendinga. Hann sætti mikilli gagnrýni hér á landi árin 2010 og 2011 þegar hann gjörsamlega frysti Eið Smára Guðjohnsen hjá Stoke er hann sat límdur við varamannabekk liðsins.

Saga hans með Íslendingaliði Stoke City hófst hins vegar fyrir tilstilli íslenskra eigenda félagsins, sem bæði réðu og ráku Walesverjann á sínum tíma.

Þegar Stoke varð Íslendingalið

Íslenskur fjárfestahópur festi kaup á Stoke City árið 1999. Gunnar Þór Gíslason leiddi kaupin og varð stjórnarformaður félagsins en Magnús Kristinsson stofnaði með honum eignarhaldsfélagið Stoke Holding sem keypti Stoke með aðstoð Kaupþings.

Í Morgunblaðinu árið 1999 má sjá mynd af fulltrúum Kaupþings og Stoke Holding, eignarhaldsfélags fjárfestanna, er þeir skrifuðu undir samning um kaupin. Stoke var í íslenskri eigu fram til ársins 2006 en þá keypti Peter Coates félagið öðru sinni. Það hafði verið í hans eigu frá 1986 þar til hann seldi það til íslenska hópsins.

Coates-fjölskyldan hefur þá átt og rekið félagið allar götur síðan hún keypti 2006.

Guðjón Þórðarson var ráðinn þjálfari Stoke í nóvember 1999 og stýrði liðinu fram á vormánuði 2002.  Íslenskir eigendur Stoke voru svo fyrstir til að gefa Tony Pulis tækifæri til að þjálfa Stoke en hann tók við félaginu árið 2002 eftir skammvinna og misheppnaða stjóratíð Steve Cotterill.

Pulis var með liðið til 2005 en þá rekinn af Íslendingunum. Hollendingurinn Johan Boskamp var ráðinn í hans stað. Boskamp gekk ekki vel í starfi og Peter Coates sagði honum upp sumarið 2006, en hann hafði keypt liðið aftur af íslenska fjárfestahópnum í maí sama ár.

Hætti sér í einkaherbergið

Pulis ber þeim íslensku misvel söguna í hlaðvarpi fyrrum markvarðarins Ben Foster, sem var á mála hjá Stoke í tíð Íslendinganna, sem ungur leikmaður.

Þegar Guðjón Þórðarson yfirgaf Stoke árið 2002 höfðu sex íslenskir leikmenn tekið þátt á lokaleiktíð hans; Brynjar Björn Gunnarsson, Bjarni Guðjónsson, Ríkharður Daðason, Stefán Þórðarson, Pétur Marteinsson og Birkir Kristinsson.

Þar er aðeins nefndur hluti þeirra íslensku leikmanna sem höfðu flykkst til Stoke-on-Trent í þjálfaratíð hans frá 1999 til 2002. Lista yfir alla Íslendinga sem hafa leikið fyrir Stoke City má sjá fyrir neðan.

Eftir fyrsta sumargluggann undir stjórn Pulis voru aðeins þrír eftir á hans fyrstu leiktíð, tímabilið 2002 til 2003. Brynjar Björn var fastamaður undir hans stjórn fyrstu leiktíðina og Bjarni Guðjónsson fékk einnig töluvert að spila.

Pétur Marteinsson var hins vegar varaskeifa. Strax sumarið 2003 höfðu þeir þrír hins vegar allir yfirgefið félagið og enginn íslenskur leikmaður stóð eftir.

Pulis segir í hlaðvarpinu sögu af því þegar einn íslensku fjárfestanna kom að máli við hann eftir leik á Britannia-vellinum, heimavelli Stoke, þessa fyrstu leiktíð. Hann kallaði eftir því að Pétur Marteinsson fengi meira að spila á kostnað Gerry Taggart, sem hafði átt langan feril í ensku úrvalsdeildinni áður en hann kom á gamals aldri til Stoke.

„Við vorum með íslenska fólkið þarna. Það var öðruvísi en hjá Peter Coates því þegar Peter stýrði ferðinni var stjórnarherbrgið opið eftir leik. Allir blönduðu geði,“ segir Pulis.

„Íslendingarnir voru með stjórnarherbergi, en svo lítið herbergi fyrir sig sem þeir voru vanir að fara í. Og eftir leikinn var ég aldrei mikið fyrir að fara í stjórnarherbergið. Ég var svolítið stressaður ef einhver skyldi segja eitthvað og ég myndi láta eitthvað út úr mér í hita leiksins,“

„Einn daginn, eftir góðan leik, sem við unnum 2-0 eða eitthvað slíkt, fór ég upp og Íslendingarnir voru í litla herberginu sínu,“ segir Pulis.

Maðurinn sem skallaði boltann heppinn að fá hann í höfuðið

Pulis hafi farið í hið svokallaða einkaherbergi að heilsa upp á íslenska hópinn ásamt aðstoðarþjálfara sínum David Kemp.

„Svo ég og Kempy komum inn og við settumst við þetta stóra langborð og þeir eru spjallandi saman. Einn af íslensku stjórnendunum sneri sér að mér og sagði að þeir væru með íslenska leikmenn þar. Þeir vildu að ég myndi spila þeim en ég spilaði þeim aldrei,“ segir Pulis léttur.

„Einn þeirra var miðvörður. Svo hann sagði: „Má ég spyrja þig, Tony, af hverju heldurðu áfram að spila Gerry Taggart?“ segir Pulis frá en miðvörðurinn sem á við er Pétur Marteinsson, sem spilaði ekki mikið undir stjórn Pulis.

„Svo ég sagði: Tja, ég held að hann sé besti miðvörðurinn sem við höfum. „Hann er heppinn,“ svaraði Íslendingurinn mér,“ segir Pulis frá.

„Hvur fjárinn hugsaði ég, þetta er maður sem hefur spilað um 550 leiki. Svo ég svara: „Ó já, er það? Hvað meinarðu?“ Íslendingurinn svarar: „Tja, í hvert skipti sem boltinn fer inn í teiginn fær Taggart hann í höfuðið,“ segir Pulis við sjokk og hlátrasköll þáttastjórnenda. Augljóst þyki að Taggart hafi þar varist vel og skallað boltann frá, en ekki fengið hann hreinlega í höfuðið heppni sinnar vegna.

„Guð minn góður, ég sver upp á líf mitt[að hann sagði þetta],“ segir frá Pulis hlægjandi. „Svo ég svaraði: „Hann hefur gert það í um 550 leiki. Takk kærlega. Tala við þig síðar,“ og Pulis hafi í kjölfarið gengið á dyr.

Pulis er einn farsælasti stjóri í sögu Stoke City en hann stýrði liðinu upp í ensku úrvalsdeildina árið 2008. Þá fór liðið í efstu deild í fyrsta sinn frá árinu 1985.

Undir hans stjórn fór Stoke í úrslit FA-bikarsins í fyrsta skipti í sögu félagsins árið 2011 og tók þátt í Evrópudeildinni árið eftir.

Pulis yfirgaf Stoke árið 2013 en átti síðar eftir að stýra Crystal Palace (og var þar valinn þjálfari ársins í ensku úrvalsdeildinni), West Bromwich Albion, Middlesbrough og Sheffield Wednesday, sem var hans síðasta þjálfarastarf árið 2020.

Hlaðvarpið sem um ræðir er hengt við í Spotify-spilaranum en auk þess að hlusta má einnig sjá það í mynd. Sagan af íslenska stjórnarmanninum hefst þegar 38 mínútur og 28 sekúndur eru liðnar af þættinum.