Telur sig hafa fengið hálf­gert lof­orð frá ÍSÍ um fjár­muni

Búið er að samþykkja út­hlutun úr af­reks­sjóði ÍSÍ fyrir árið 2025 upp á alls rúmar 519 milljónir króna. KSÍ er eina sér­sam­bandið innan ÍSÍ, sem sóttu um út­hlutun úr sjóðnum í ár, sem fær ekki krónu úr sjóðnum og hefur ekki fengið frá árinu 2017. Það þykir mönnum á Laugar­dals­velli miður.

„Fyrst og fremst eru þetta mikil von­brigði,“ segir Þor­valdur við íþrótta­deild. „Ég ætla nú samt að taka það fram að ég fagna því fyrir hönd hinna sér­sam­bandanna að þau séu að fá fé. Auknar tekjur fyrir þau og ég gleðst fyrir þeirra hönd og fyrir þau að fá fjár­magn inn en fyrir okkur er þetta ekki gott. Við teljum okkur eiga rétt á að fá inn fé úr þessum af­rek­sjóði en því miður erum við enn og aftur ekki að fá út­hlutun. Höfum ekki fengið síðan árið 2017.“

„Það segir sig sjálft að það yrði mjög gott að hluta af þessari út­hlutun inn í reksturinn og hreyfinguna. Við gætum þá gert fleiri hluti. Við höfum þurft að skera svolítið niður hjá okkur á þessu ári en höfum verið með mjög ábyrgan rekstur undan­farið ár. Við verðum að átta okkur á því að knatt­spyrnu­hreyfingin er stærsta hreyfingin innan vébanda ÍSÍ. Hún er stór og innan ÍSÍ erum við með ansi marga iðk­endur. Við erum í rauninni bara að biðja um smá sann­girni. Að það sé horft til þess að við erum stór fjölda­hreyfing. Við erum hvað svekktastir með það. Við viljum að það sé sann­girni í þessu. Að það sé horft fram veginn og séð hvað við erum að gera. Það er út­hlutað til allra, enn og aftur þá fagna ég fyrir hönd hinna, en við viljum fá hluta af þessu líka.“

Skýringar ÍSÍ á því eru á þá leið að fjár­hags­staða KSÍ sé ein­fald­lega of góð. Þörfin á fé úr af­reks­sjóði sé ein­fald­lega meiri hjá minni sér­sam­böndum.

„Þetta var svo sem sett inn í reglu­verkið í kringum af­rek­sjóðinn og þvíum­líkt en það segir sig sjálft að við erum að reka þetta með ábyrgum hætti. Við gerum það vel en 2023 var ekki gott ár fyrir sam­bandið. Stórt tap þá en við erum að sýna ábyrgð og reka þetta vel. Við getum ekki einn daginn öll staðið saman og verið vinir í skóginum og svo þegar að farið er að út­hluta fáum við ekki neitt.“

Það er þó ekki öll nótt úti enn fyrir KSÍ því fram­lag ríkisins til ÍSÍ hækkar um 637 milljónir króna árið 2025 frá síðasta ári og á að út­hluta hluta af því fjár­magni til sér­sam­banda á árinu.

„Ég vona að með meira fjár­magni, sem á að koma inn núna í byrjun árs, um sex hundruð milljónir sem menn hafa fengið inn og eftir að hafa átt gott sam­tal við for­ystu­menn ÍSÍ þá er það okkar skilningur að við séum að fara fá inn hér styrk frá þeim á nýju ári.“

En þegar að þið sækið um, með reynslu síðastliðinna ára í huga, varstu bjartsýnn á að fá út­hlutun úr af­reks­sjóðnum?

„Ég var svo ein­faldur já. Ég hélt það en það var greini­lega ekki. Ég tel okkur hafa unnið heiðar­lega að því og á kurteisan og sann­gjarnan máta. Ég vona það svo sannar­lega, og eigin­lega vona það ekki, ég tel mig hafa fengið hálf­gert lof­orð um það að við fáum eitt­hvað úr því. Sem betur fer er það mjög gott.“