Fyrsta yfir­lýsing Assads: Fer fögrum en ó­sönnum orðum um sjálfan sig

Í yfirlýsingunni, sem rússneskir ríkismiðlar hafa sagt frá, segist Assad vilja segja sína hlið á sögulegum vendingum í Sýrlandi og segir hann sannleikann hafa verið afbakaðan. Öryggishagsmunir hafi þó komið í veg fyrir að hann hafi getað tjáð sig, fyrr en nú, og segist hann ætla gera frekar skil á sinni afstöðu í framtíðinni.

Yfirlýsingin var birt á Telegram-síðu forsetaembættis Sýrlands og vísað í hana í ríkismiðlum Rússland, þar sem Assad er. Ekki hefur þó verið staðfest að hún sé frá Assad sjálfum.

Assad segist ekki hafa ætlað sér að flýja Sýrland en hann hafi þurft að gera það þegar ljóst varð að varnir stjórnarhers hans höfðu alfarið fallið saman undan skyndisókn uppreisnarmanna HTS í norðvesturhluta Sýrlands og þess að aðrir hópar tóku einnig upp vopn víðsvegar um landið.

Sjá einnig: „Við erum að erfa útblásið bákn, þjakað af spillingu“

Assad hafði þá hörfað til herstöðvar Rússa í Latakiahéraði. Hann segir uppreisnarmenn hafa gert ítrekaðar drónaárásir á herstöðina og yfirvöld í Kreml hafi þá farið fram á að hann yrði fluttur úr landi og til Rússlands. Þar sem allar aðrar leiðir úr herstöðinni hafi verið lokaðar honum, hafi hann samþykkt að fara til Rússlands.

Um kvöldið 8. desember, eftir að uppreisnarmenn höfðu tekið Damaskus, flúði Assad til Rússlands.

„Á engum tímapunkti hafði ég íhugað að stíga til hliðar eða flýja og hafði enginn lagt slíkt til. Það eina í stöðunni var að halda baráttunni gegn árásum hryðjuverkamanna áfram,“ skrifar Assad.

Lofar sjálfan sig

Því næst fer Assad fögrum og ósönnum orðum um sjálfan sig og baráttu sína fyrir sýrlensku þjóðina. Hann hafi ávallt neitað að gefa eftir hagsmuni þjóðarinnar fyrir eigin hag, þrátt fyrir ítrekuð gylliboð, og hafi staðið við hlið almennra hermanna á víglínunni í gegnum borgarastyrjöldina í Sýrlandi.

Hann segist þar að auki aldrei hafa gefið frelsi Palestínu og Líbanon upp á bátinn né svikið bandamenn sína.

Sjá einnig: Hver er Assad? Læknaneminn sem varð að einræðisherra

Assad segist aldrei hafa sóst eftir persónulegum auð, heldur litið á sjálfan sig sem varðmann sýrlensku þjóðarinnar. Hann hafi gefið allt til að verja þjóðina, ríkið og stofnanir og frelsi þjóðarinnar til hins síðasta.

Assad hefur lengi verið sakaður um umfangsmikil og tíð grimmdarverk í Sýrlandi. Ríkisstjórn Assads stundaði það lengi að láta fólk hverfa en slíkum tilfellum fjölgaði mjög um 2011, þegar andóf gegn ríkisstjórninni jókst. Pyntingar voru tíðar og voru fjölmargir látnir hverfa í fangelsiskerfi landsins.

Mannréttindasamtök telja að frá 2011 hafi rúmlega 96 þúsund manns horfið í fangelsum Sýrlands.

Þá hefur Assad látið gera efnavopnaárásir á óbreytta borgara í Sýrlandi, auk þess sem svokölluðum tunnusprengjum hefur ítrekað verið varpað á sýrlenskar borgir. Bandamenn Assads; Rússar, Íranar og Hezbollah, hafa einnig verið sakaðir um fjölmörg ódæði í Sýrlandi í gegnum árin.

Ríkisstjórn Assads var einnig viðloðin umfangsmikla framleiðslu og sölu á fíkniefninu Captagon, sem glæpamenn og aðrir hafa dreift um Mið-Austurlönd og víðar.

Sjá einnig: Hvað verður um umfangsmikinn fíkniefnaiðnað Sýrlands?

Talið er að síðan Hafez al-Assad tók völd árið 1970 hafi hann og síðan Bashar al-Assad, safnað umfangmiklum auðmunum víðsvegar um heiminn. Fjölskyldan er talin eiga fasteignir og fyrirtæki víða um heim. Meðal annars er fjölskyldan talin eiga dýrar byggingar í Rússlandi, hótel í Vínarborg og einkaþotu í Dubai.

Wall Street Journal segir umfangsmikla leit að þessum auðmunum standa yfir.

Heita kosningum á næsta ári

Í lok yfirlýsingarinnar segist Assad enn telja sig tilheyra sýrlensku þjóðinni og að hann voni innilega að hún öðlist aftur frelsi og sjálfstæði, sem verður að teljast nokkuð kaldhæðnislegt.

Uppreisnarmennirnir sem eru nú með stjórnartaumana í Sýrlandi þykja mjög íhaldssamir en enn sem komið er hefur yfirtaka þeirra að mestu farið friðsamlega fram.

Ahmed Al-Sharaa, sem gengið hefur undir nafninu Abu Mohammed al-Jolani og leiðir öflugasta uppreisnarhópinn í Sýrlandi, sem ber nafnið HTS, hefur skipað Mohammed al-Bashir í embætti forsætisráðherra í bráðabirgðaríkisstjórn Sýrlands. Sharaa var á árum áður meðlimur al-Qaeda í Írak.

Sharaa og Bashir hafa heitið því að halda kosningar á næsta ári.

Fréttin hefur verið uppfærð.