Frá­bært gengi Brentford á heima­velli heldur á­fram

Brentford heldur áfram að gera það gott á heimavelli en í dag vann liðið Newcastle United, 4-2, í ensku úrvalsdeildinni. Þá sigraði Aston Villa botnlið Southampton, 1-0.

Fyrri hálfleikurinn í leik Brentford og Newcastle var með fjörugra móti en fjögur mörk voru skoruð á 24 mínútna kafla í honum.

Bryan Mbeumo kom Brentford yfir á 8. mínútu en Alexander Isak jafnaði þremur mínútum síðar. Yoane Wissa kom heimamönnum aftur yfir á 28. mínútu en Harvey Barnes jafnaði fyrir gestina á 32. mínútu. Staðan í hálfleik var 2-2.

Á 56. mínútu skoraði varnarmaðurinn Nathan Collins eftir sendingu frá markverðinum Mark Flekken. Á lokamínútunni gulltryggði Kevin Schade svo sigur Brentford með sínu fjórða marki í síðustu þremur leikjum.

Með sigrinum komst Brentford upp í 7. sæti deildarinnar. Af þeim 23 stigum sem liðið hefur náð í hafa 22 komið á heimavelli. Newcastle, sem er án sigurs í síðustu fjórum leikjum, er í 12. sæti með tuttugu stig.

Annar sigur Villa í röð

Villa lyfti sér upp í 5. sæti deildarinnar með sigrinum á Southampton. Jhon Durán skoraði eina mark leiksins á 24. mínútu.

Villa hefur unnið tvo leiki í röð eftir afar brösugt gengi þar á undan.

Southampton hefur tapað tólf af fimmtán leikjum sínum í vetur og er á botni deildarinnar með einungis fimm stig, átta stigum frá öruggu sæti.