Í fréttum Stöðvar 2 var fjallað um þá óvissu sem ríkt hefur um samgönguáætlun allt þetta ár. Eftir að ríkisstjórnin sprakk í síðasta mánuði varð fljótlega ljóst að samgönguáætlun yrði ekki lögð fram á yfirstandandi þingi en henni var ætlað að marka nákvæma forgangsröðun í vegagerð á næstu árum.
Í áliti meirihluta fjárlaganefndar, sem lagt var fram á Alþingi í kvöld fyrir 2. umræðu fjárlaga, er þess hins vegar freistað að gefa leiðbeiningar um hvað hægt sé að bjóða út á næsta ári og rjúfa þannig fjórtán mánaða útboðsstopp Vegagerðarinnar. Jafnframt liggur fyrir breytingartillaga frá ríkisstjórninni sem ætlað er að gera Vegagerðinni kleift að semja um smíði Ölfusárbrúar.
Helstu verkefni sem til stóð að hefjast handa við á þessu ári en legið hafa í salti eru: Fossvogsbrú, Vesturlandsvegur um Kjalarnes, Gufudalssveit, Dynjandisheiði og nýr vegur um Brekknaheiði. Meginástæðan er fjárskortur meðal annars vegna þess að ófjármagnað Hornafjarðarfljót sogaði til sín fjárveitingar frá öðrum verkum.
„Sökum þess hve kosningar til Alþingis fara fram á óvenjulegum tíma hefur ekki tekist að leggja nýja samgönguáætlun til fimm ára fyrir Alþingi. Þar með er nákvæm forgangsröðun verkefna ekki til staðar í þingskjölum,“ segir í nefndarálitinu.
Nefndin bendir á að í samgönguáætlun fyrir árin 2020-2024, sem fellur úr gildi núna um áramótin, liggi fyrir forgangsröðun verkefna sem dregist hafi að ljúka. Þar að auki liggi fyrir langtímasamgönguáætlun til ársins 2034.
„Ekkert er því til fyrirstöðu að Vegagerðin, í samráði við innviðaráðuneyti, geti gert samninga við verktaka eins og í hefðbundnu árferði,“ segir nefndin ennfremur.
Samkvæmt upplýsingum fréttastofu innan úr stjórnkerfinu er svigrúm Vegagerðarinnar til nýrra útboða þó áfram skert sökum þess að Hornafjarðarfljót mun áfram taka til sín fjármuni á næsta ári sem markaðir voru öðrum verkum.
En hvaða verkefnum verður þá hægt að vinna að á árinu 2025? Meirihluti fjárlaganefndar gefur þetta svar:
„Veigamestu framkvæmdir verða á Vestfjörðum, m.a. á Dynjandisheiði og í Gufudalssveit, á Reykjanesbraut og á hringvegi um Hornafjarðarfljót. Í áætlunum er gert ráð fyrir því að þeim framkvæmdum ljúki að mestu árið 2025 og því verði aukið svigrúm til nýrra verkefna árið 2026. Nefndin gerir ráð fyrir því að þá liggi fyrir samþykkt samgönguáætlun til fimm ára.“
Þarna eru fjögur verkefni tilgreind. Tvö þeirra, Dynjandisheiði og Gufudalssveit, eru stopp og bíða útboðs. Hin tvö, Reykjanesbraut og Hornafjarðarfljót, eru í fullum gangi og ekki þörf á frekari útboðum vegna þeirra.
Engin lína er gefin í nefndarálitinu um hvort hægt verði að fara á fullt í önnur stórverkefni á næsta ári, eins og Fossvogsbrú, breikkun Vesturlandsvegar á Kjalarnesi eða Brekknaheiði. Ekki er minnst á jarðgöng.
Meirihluti fjárlaganefndar fjallar einnig í áliti sínu um breyttar forsendur vegna Ölfusárbrúar. Verkefnið er búið að vera strand vegna þess að ríkisábyrgðasjóður efast um að veggjöld dugi til að greiða brúna að fullu, eins og gerð er krafa um í heimildargrein fjárlaga.
Fyrir liggur breytingartillaga frá Sigurði Inga Jóhannssyni fjármála- og efnahagsráðherra í bandorminum svokallaða þess efnis að það dugi að vegtollar borgi bara helming kostnaðar og að það megi borga hinn helminginn með framlagi úr ríkissjóði.
Um þessa breytingartillögu ráðherrans segir fjárlaganefnd:
„Þar kemur fram að framkvæmdin geti ekki hafist nema Alþingi samþykki nýja heimild.
Þá er rétt að halda því til haga að eftir sem áður er brýnt að veggjöld standi undir kostnaði að langmestu leyti. Meirihlutinn telur ekki viðunandi að miða við 50% af heildarkostnaði framkvæmdar eins og þó er gefinn ádráttur um í ákvæði til bráðabirgða. Þess í stað verði miðað við það að innheimta allan áfallinn kostnað með veggjöldum.
Þá bendir meirihlutinn á nauðsyn heildarendurskoðunar laga um samvinnuverkefni í ljósi reynslu af byggingu brúar yfir Hornafjarðarfljót og Ölfusá,“ segir í nefndarálitinu sem dreift var á Alþingi í kvöld.
Hér má sjá frétt Stöðvar 2 frá því fyrr í kvöld:
